Элстин сурһулин заведеньст ясврин көдлмш кегджәнә
Элст балһсна школмудт болн бичкдүдин садмудт ясврин көдлмш гүргүдән. Энд бичкн ясвр кесн деерән, гермүдин ора сольгдх. Энүнә төлә болн түүмрәс саглулһна кергт Элст балһсна муниципалитет аврн тавн сай арслнг йилһж өгчәнә. Тер мет Доступная среда нертә федеральн программар арвн долан сай арслнг олзлх кергтә.
Ода Элстин лицейн герт ясврин көдмш гүргүдән. Тосхлтын көдлмш бүрткхин төлә Элст балһсна администрацин толһачин дарук Галина Васькина нааран ирв. Эн жил шинрүлһнә көдлмшин кемжән дегд ик биш. Давсн жилд түрүн болж тәвн жилин хөөн энд лицейин һол гериг капитальн кевәр ясх арһ учрв. Ода гер шин бәәдл һарч одв. Иим ясврин көдлмш танһчин толһачин нилчәр Әрәсән президентин көрнгин сангас ирсн арвн хойр сай апрлснг мөнгәр кегдв.
Элстин лицейин директор Татьяна Питькееван келсәр, йилһж өгсн цуг мөнгн лицейин һол корпус яслһнд олзлгдв.
Директор Татьяна Питкееван келсәр, ода сурһулин учреждень кесг гер эзлжәхәс иштә эн жил талдан хойр герт ясврин көдлмш кех шиидвр авгдв. Эн корпуст сурһулин кабинетмудын өөр музей, библиотек, актов зал бәәнә. Ода шинрүлж ясврин көдлмш гүргүдән. Элст балһсна муниципалитетын йилһж өгсн мөнгәр усна сурвлжна болн канализационн систем ясгдв. герин ора сольгдв, спортивн залд ясвр кегджәнә.
Лицейин директор Татьяна Питкееван келсәр, ясврин көдлмшиг тосхлтын компаньс бооцаһар күцәх. Иим көдлмшиг сәәнәр кех кергтә. Тегәд чигн бооцан батлгдв. Тосхачнр ясврин көдлмшиг сән чинртәһәр кех гиж санжанав.
Ода иим ясврин көдлмш талдан чигн сурһулин заведеньст кегджәнә. Хотл балһсна администрацин толһачин дарук Галина Васькина келсәр, ясврин көдлмш кехин төлә мөнгн цуг школмудт болн бичкдүдин садмудт йилһж өггдв. Зәрм эрдм-сурһулин учрежденьст шинрүлж яслһна көдлмшлә зерг герин ора сольгдх. Энүнә төлә тавн сай арслнг һарһж өггджәнә.
Галина Васькина келсәр, муниципальн бюджетас хамгин ик мөнгн дөрвдгч школын ора яслһна төлә йилһж өггдв. Эн школ хамгин хуучн болжана. Тегәд школмудын гермүдин бәәдл шинжлгдәд мөнгн йилһж өггджәнә. Цугтаднь әдл биш.
Тер мет Доступная среда нертә федеральн программар арвн долан сай арслнг олзлх кергтә. Энүнәс ик зууһинь жирн процентинь муниципалитет йилһж өгхмн.
Галина Васькина келсәр, эн мөнгиг арвдгч, арвн хойрдгч, арвн доладгч школмудт йилһж өгх. Тенд инвалид бичкдүд сурхин төлә сән таал бүрдәгдх. Элст балһснд инвалид бичкдүд талдан сурһульчнрла әдл сурч чадх.
Элстин мэрийн специалистнрин келсәр, ода энүнә төлә арвн атвн сай арлснг йилһж өггдв. Ода ясврин көдлмш төгсх болзгнь көдлмшин кемжәнлә болн һардачнр иим көдлмш яһж бүрдәснлә залһлдата. Ямаран болв чигн, августын арвн тавн күртл цуг школмуд сурһулин шин жилд ясврин көдлмш төгсәх зөвтә.
Чучян Валентина, Очра Сергей
