Элстин олн мергжлттә гимназь бүрдснә 25 жилин өөн темдглгдв

Элстин олн мергжлттә гимназь бүрдснә 25 жилин өөн темдглгдв. Гимназин байрин кекрг-үүлдврт педагогическ күч-көлснә ветеранмуд, эн гимназиг урднь төгсәсн улс, министерствсин болн ведомствсин элчнр орлцв. Һоллгч керг-үүлдврин хөөн цуг орлцачнр байрин концерт хәләв.

Байрин өдр ке-сәәхнәр кеерүлгдсн школд олн әмтн хурцхав. Дигтә эн улс кезә нег цагт энд медрл авд жирһлин өргн хаалһдан орсн болдг. Школ эврә үүдән холл 1987-гч жил секәд, түрүн сурһульчнран орулж авсн болдг. Хөрн тавн жилин эргцд хойр минһ һар күүкд-кзвүд эн школд сурч һарсмн. Теднәс долан күн алтн медаляр, 50 күүкд-көвүд цаһан медаляр төгсәсн болдг. Хойр минһдгч жил болхла школын керг-үүлдврт шинрлт орулгдад, тер цагас авн Элстин олн-мергжлттә гимназьд хүврсмн.

Эн тоотын тускар гимназин директор, Клим Насунов тодрхаһар келж өгәд, гимназин эндр өдрә күцәмжин тускар, эдн көдлжәх дамшлтта багшнрин тускар тодрхаһар келж, байрин өдрин йөрәлән тусхав.

Эндр өдр гимназь альк чигн халхарн хамгин өөдән күцәмж бәрж йовх эрдм-сурһулин учрежденя негнь болжана. Өдгә цагт гимназьд Әрәсән эрдм-сүрһүлин йилһән сән көдләчнр, Хальмг танһчин ачта багшнр, танһчин толһачин мөрән лауреатнр көдлж дорас өсч йовх баһчудт медрл заажана. Эн багшнрин тоот орс келнә болн литератутин багш Лидия Чуповаг заах кергтә. Дөч һар жил эн багш эврә дурта эрдмдән нерәдсмн. Энүнә сурһсн сурһульчнр дундас нертә, дамшлтта эмчнр, юристнр, арһлачнр болн багшнр һарсмн. Зәрм багшнрнь төрскн школдан ирж көдлжәцхәнә.

Гимназин һол күцәмжнь болхла — багшнрин йоста профессиональн команд гиж келх кергтә. Цуг сансн тоотан күцәһәд, дорас өсч йовх баһчудт кергтә медрл өгхин кергт эднд цуг таал бәәнә. Һол сурһуляс нань соньмсх тоот бас баһ биш.

Ямр нег байрин өдрлә йөрәлин үгмүдлә зергдән белгүд чигн белглдг сән авьяс бәәнә. Эн өдр балһсна мэрий гимназьд кергтә тоот хулдж авх мөнг һарһж өгв. Танһчин эрдм-сурһулин, сойлын болн номин министр Лариса Васильева компьютер белглв. Эврәннь үгдән танһчин эрдм-сурһулин министр гимназин багшнрт, сурһульчнрт цуг халхин күцәмж дурдв.

Эндр өдрә сурһульчнр болхла гимназин ул татсн ах үйнриннь дамшлтар сурһулян сәәнәр сурч, гимназин нериг һарһж балһснд, танһчд болн Әрәсәд давдг керг-үүлдврмүдт шунмһа кевәр орлцж йовцхана.

Ээнән Дельгр, Ирчина Алексей