Элстин лифтмуд мууһар көдлжәнә. Эднәс зәрминь сольх кергтә
Эдлврин болзг давсн лифтмудын капитальн ясвр болн энүг шинрүлһн Элст балсһна әмтнд хурц төрт хүврв. Хуучн лифтмуд дару-дарунь хамхрна, нег үлү иим оборудовань му дүрс һарв. Лифтын эдл-ахун халх ясрулхин төлә хойр минһн арвн тавдгч жил күртл Әрәсән правительств шишлнг программ батлж авх саната. Эн программар хотл балсһна олн давхрта гермүдин дөчн тавн лифт шинрүлгдхмн. Ода болхла кесг пенсионермуд лифт уга болад йосндан түржәнә. Эдн гертәсн һаза һардг арһ уга болв.
Энүг күн шатасмн аль электрокүчнә сунһугас көлтә һал орсмн. Энүнә учрин тускар бәәрн герин әмтн ода күртл медәд уга. Түүмр шатсн цагас авн дөрвн сар давв. Зуг эн туст бәәдл тас чикржәхш. Залврин компань лифт сольхар седжәхш, давшурин плошадк чигн ясх санан уга. Наталья Бондыреван келсәр, ясвриг кедү жилдән күләхмб? Сар болһн лифтын ясврин мөнг орулж өгнә.
Йисн давхрта герт ода бичкн үртә болн гемтә көгшдүдтә өрк-бүлмүд дала. Хамгин түрүнд эдн күнд таалд тусв. Дәәнә болн күч-көлснә ветеран Петр Куберлиновин авальнь һаза һарад, аһар ккиләд. нәәжнртәһән, таньдг улслаһан күүндх арһ уга болв. Зун төгсж йовна, һаза һарч болжахш гиж Петр Куберлинов һундлтаһар келнә. Дәәнә болн күч-көлснә ветеран Петр Куберлиновин келсәр, клеткт бәәснлә әдл бәәнә. Һазаран зуг эм хулдж авхар һарна. Медәтә улст күнд болжана.
Тер мет Зоя Бочаева бас ик түрү үзжәнә. Гемтә күүкд күн әрә гиж гертән йовжана. Һаза һархин тускар ухалж болшго. Ода йисдгч хамгин өндр давхрт бәәнә. Инвалид Зоя Бочаеван келсәр, хойр долан хонг болад больницд одх кергтә. Йисдгч давхрас яһж буухмб? Урднь көвүнь һар деерән авад, һаза һарһдг бәәж. Иим бәәдл кезә чикрхмб, медгджәхш.
Түүмр шатхин өмн чигн лифт дару-дарунь хамхрдг бәәсмн. Пенсионерк Валентина Вострикован келсәр, лифт күн хәләж бүртксн уга. Өдр-сө уга тасрхан уга көдлдг билә. Аштнь лифт шатад хамхрв. Пенсионерк Валентина Вострикован келсәр, электрокүчнә сунһуг эвдрәд, лифт шатв. Энүг слесармуд ирж хәләхш. Өрүн эртәс авн сө ора күртл көдлнә. Урднь сө арвн негн час күртл көдлдг билә. Өрүн зурһан часла дәкнәс көдлх зокал бәәсмн. Ода болхла иим диг-даран уга болж одв гиж медәт келнә.
Лифт ямаран учрар шатсмн, залврин компань кезә энүг ясхмн, бәәрн әмтн кедү цагтан лифт уга бәәхмб? Эн сурврмудт мана үүдәгч баг хәрү авч чадсн уга. Залврин компаня һардачнр көдлмштән уга бәәж. Телефоһар бас эднлә күүндж болсн уга. Эн төрәр бидн танһчин жилишн-коммунальн эдл-ахун министерствд цәәлһвр аавхар одвидн. Хотл балһсна лифтын эдл-ахун тускар энд тодрхаһар келж өгв. Өдгә цагт Элст балһснд һучн дөрвн олн патьрта герт найн дөрвн лифтын оборудовань эдлврт бәәнә. Энүнәс дөрвнә кеснь нег хүвнь хуучрад, сольх кергтә. Давсн жилд капитальн ясвр кех федеральн программд орснас иштә олн давхрта тавн герт лифтмуд шинрүлгдв. Талдан гермүдт иим ясвриг ТСЖ эс гиж залврин компаньс күцәх зөвтә.
Хальмг танһчин жилишн-коммунальн эдл-ахун министрин дарук Эллина Савченкон келсәр, эн төриг олн-зүсн кевәр хаһлж болх. Гермүдин эздүд эврән мөнг орулж өгч чадх, эс гиж залврин компань эздүдин шиивдрәр, өгяь мөнг авч чаджана. Цуг эн неквр мөнгнә цааснд бичгдх зөвтә.
Лифт олхлһна төр ода цуг Әрәсәд хурц төрт хүврв. Тегәд эн бәәдл тоот авгдад, хойр минһн арвн тавгдгч жил күртл лифтмуд сольж шинрүлһнә шишлнг программ Әрәсән правительств батлж авх саната. Элст балһснд эн программар дөчн тавн лифт сольгдх зөвтә.
Чучян Валентина, Ирчин Алексей
