Элстин көгшдүдин герт медәтнр өрк-бүлән тогтав
Элст балһсна көгшдүдин болн инвалидмудын гер-интернатд дарани хүрм болв. Энд бәәсн медәтә улс талдан улсла әдл нег-негән дурлад, өрк-бүлән тогтана. Талдан улсин келсн үгмүд сонслго, эдн бәәхтә хөвтә жирһл эдлхәр зүткнә, өөрхн улстан килмж тусхана. Талдан әмтнд дөн күргж чадхан медүлж, эднә зәрмнь ода күртл чанһ-чиирг болн заглюн.
Көгшдүдин болн инвалидмудын гер-интернатд ик шуган болсн уга. Архаковин өрк-бүл хамдан бәәсн улстаһан хүрмән кев. Далн хойр наста Валентина Мололкина болн далн зурһан наста Иосиф Архаковин хүрм эн жил хойрдгч хүрм болв. Эднә келсәр, өөрнь өөрхн күн бәәхлә, күн һанцардлго, гейүрдхш. Эднә өрк-бүлин хөвтә жирлһ шинкн эклжәнә гиж медәтнр тоолжана.
Шинкн өрк-бүлән тогтасн улст салу хора йилһж өгв. Эдн хйор жил хооран таньлдж. Энүнә өмн эдн эврә жирлһин хаалһар йовж йовла, эврә өрк-бүл бәәсмн. Валентина Григорьевна сүл долан жилд медәтнрин гер-интернатд бәәжәнә. Хөрн жилдән телефонистк болж көдлв. Түрүн авальтаһан һучн жилдән хамдан бәәв. Хөөннь зеткр учрад, һурвн үрнәс зуг нег инвалид күвүн үлдв. Ода Валентина Григорьевна нүднә харань му болад, бас инвалид болв. Валентина Мололкина келсәр, Иосиф ор һанцхарн бәәнә. Нег-негән энд олж авч. Жирһлин үлдсн хаалһар хамдан йовх заян бәәж.
ЗАГС-ин көдләч Елена Донкаева иим хүрм түрүн болж темдглж бичжәнә. Иим медәрсн цагт әмтн бас өрк-бүлән тогтаж чаджана гиж эн тоолжана. Көгшдүд талдан улсла әдл соньн кеәвр өрк-бүләрн бәәж чадх. Элст балһсна ЗАГС-ин ах специалист Елена Донкаеван келсәр, өрк-бүл тогтахар седсн улсиг ЗАГС дөнннә. Ямаран чигн наста әмтн өрк-бүлән тогтаж чадх. Нег үлү ммедәтнр иим шиидвриг сәәнәр ухалжах батлж авна.
Элст балһсна медәтнрин болн инвалидмудын гер-интернатд ода зун далн хойр күн бәәнә. Эднәс өрәлнь негдгч болн хйордгч багмудын инвалидмуд. Эднә төлә интернатын көдләчнр цуг бәәцин таал бүрдәхәр зүткнә. Энүнә директор Хатимулла Идрисовин келсәр, энд арвн өрк-бүл бәәршлжәнә. Өрк-бүлтә улс цуг күнд-түрүг хамдан дааж һарна. Энд бәәхд невчк гиигн болна. Элтс балһсна көгшдүдин гер-интернатын директор Хатимулла Идрисовин келсәр, эн хойр күн оньдин хамдан йовна, хот хамдан ирж ууна. Иосиф Михайлович Валентина Мололкинад йоста чикн-нүдн болжасмн. Һараснь көтләд хот уудг хорад дахулж ирнә. Ода болхла нег өрк-бүл болад, нег-негндән дөн болх.
Дуран өгхд болн бүрдәхд насн боомтг болжахш. Энүнд Архаковин өрк-бүл ил герч болжана. Эн хойр күн өрк-бүлән тогтаһад, нег-негндән дөн болад, цуг учрсн зовлнгиг хамдан дааһад һарчана.
Ээнән Делгр, Ирчин Алексей
