Элстин цутхлнгд суулһсн урһа мод хулха авч
Өцклдүр асхн Элст балһсна цутхлнгд Баатрмудын аллейд бәәсн хотл балһсна әмтн нохата полицин көдләчнриг үзчкәд алнг болв. Эдн хулхачиг хәәжәсн бәәж. Долан хонг хооран Баатрмудын аллейд болн Баснг Городовиковин проспектд суулһсн урһа мод хулха авч. Эдниг унгарнь суһлад авч одв.
Долан хонг хооран Элст балһсна эдл-ахун көдләчнр Элст балһсна цутхлнгд Баатрмудын Аллейд болн Баснг Городовиковин проспектд хойр зун дорд үзгин туя мод болн хойр зүсн сангин идәнә мод суулһсмн. Болв өцклдүр өрүн Пятигорск питомникас, Ставропольск болн Ипатовск лесхохас авч ирсн өвәрц арвн йисн мод хулха авч. Ода эднә ормд хоосн нүкн үлдв. Иим мод хулдж авхин төлә өрәл сай арслнг кергтә болв. Дәкәд болхла нег мод авч ирәд суулһхин төлх хойр зун тәвн арслнг һарна.
Элст балһсна эдл-ахун директорин дарук Баснг Акиевин келсәр, эн аллейд арв һар суулһсн урһа мод хулхалсинь илткгдв. Эннь зуг эн обьектд.Мана хотл балһснд урһа модн бәәснь сән керг. Мана танһчд мод урһаж авхд жанһрта болна. Дала көдлмш кех кергтә. Тегәд мод хулхаснь һундлта йовдл болжана. Эн күүкд күүнә келсәр, мод урһаж авхд амр биш. Урһа модн бәәхлә балһсн кеернә. Энд зәрмдән йовхла урһа мод хулха авснь үзгднә. Эн залу күүнә темдглсәр, хулха кедг иим улсла бәәж болшго. Эдниг засгла харһулх кергтә.
Нег минһн йисн зун жирн зарһадгч жилд Хальмгин университетин химико-биологическ факультет төгсәсн Валентина Насунова эврәннь нәәжнртәһән болн хамдан сурчасн көвүд-күүкдлә Элст балһсна цутхлнг аллейд болн талдан чигн һазрт урһа мод суулһад, хотл балһс кеерүлсмн. Валентина Насунова Элст балһснд эврән кесг зун мод суулһв. Пенсионерк Валентина Насунован келсәр, иим йовдл дегд му гиж тоолжана. Талдан улс суулһсн мод яһад хулхалж авх дурн күрчәхмб? Эннь медгджәхш.
Иим кевәр хулха кесн йовдл дегд ик алнг болжана. Суһлж авсн модн талдан һазрт суулһхла урһшго. Нег үлү, бичкн модна унгнь эвдрж одсн болх, мана танһчд иим урһа модн мууһар урһна. Тер мет урһа мод тәрх болзгнь кезәнә давж одв. Элст балһсна эдл-ахун көдләчнрин тоолврар, энд суулһсн модн ода хотл балһснд урһжах вязь болн акац модна ормд урһх зөвтә бәәсмн. Иим модн сәәнәр урһхла, мана хотл балһсн улм кеерх.
Хотл балһсна эдл-ахун юрист Андрей Шеркишевин келсәр, энүнә тускар Элст балһсна дотр-дундын кергдүин әнгд эрлһ орулж өгв. Хулха кесн улсиг олж авад, чанһ засгла харһулх кергтә. Хулхачнр ял эс гиж зарһин шиидврәр түүрмд суух зөвтә.
Ода хулхачнр урһа мод хулхалсн деерән, талдан чигн урһмл амражахш. Элст балһсна уульнцс кеерүлж-сәәхрүлжәх специалистнр цецгүд урһжах клумбс босхж авч чаджахш. Хулхачнр цецгүд бас хулхална. Элст балһсна цутхлнг бәәх эн клумбд хойр жил хооран бамб цецгүд олра урһдг бәәсмн. Тер мет оошг цецгүдин хулхлдг йовдл бас учрна. Хавр ирсн кемд оошг цецгүд уга болж одна. Жил болһн хотл балһс кеерүлж-сәәхрүлхин тлә Элст балһсна хазнас дала мөнгн һарна. Тегәд хулхачнр хулха кедгән зогсах зөвтә гид Элст балһсна һардачнр дуудвр кежәнә.
Хавтхна Элла, Настан Сергей
