Элстин бәәрн улсла хотл балһсна һардачнр харһад күүнджәнә
Элстин доладгч, йисдгч болн хойрдгч микрорайодын бәәрн улсла хотл балһсна һардачнр харһад күүндв.Энүнд ДЭЗ-ин, эн микрорайодын залврин компаня элчнр орлцв. Харһлтын йовудт хаалһс болн гермүд яслһна, шин гермүд тосхлһна, газар, усар, электрокүчәр тетклһнә, коммунальн туслмж балһсна улст күрглһнә чинрин болн талдан чигн төрмүдәр мэрийн һардврла болсн күүндврт келгдв.
Элст балһсна улсин цуг төрмүдәр хәрү өгх санан бәәнә гиж харһлтын эклцәр мәрийин толһач Николай Андреев темдглв. Тегәд удан боллго элстихн сурврмуд экләд өгв. Сергей Камаев мөнг олхин төлә талдан балсһнд одад көдлв. Юнгад гихлә эврәннь гертән бәәж болшго болв. Камаев — олна давхрта герин хойрдгч давхрт бәәршлжәнә. Энүнә дор негдгс давхрт парикмахерск секгдв. Ода герт бәәж болжахш. Дегд шуугата болна. Авальтаһан одад, эн төриг хаһлхар седләв.
Роспотребнадзорт одад, эрлһ бичх селвг энүнд өгв. Анатолий Французов иим амр биш төриг хаһлх үгән өгв. Энүнә хөөн доладгч микрорайона бәәрн күн Владимир Кичиков сурвр өгв.Микрорайона нег хаалһиг хаасна хөөн, машидын залачнр ик холд эргәд гертән күрнә. Эн суврт депутар Сергей Мантеев хәрү өгв.
Заалд цуглрсн әмтн депутатыг дөннв. Юнгад гихлә, бичкдүд әәмшг угаһар хаалһар йовж чадх. Әмтн йовдг хаалһин утскар хотл балһсна һардачнр ухалад, эн төриг хаһлх үгән өгв. Любовь Анжанован келсәр, аварийн церглт дегд удан дуудв. Иим церглт кесгәс нааран көдлжәхш. Яһад энүг хаасмб гиж күүкд күн алмацжана. Любовь Анжанован келсәр, бүкл долан хонгтан турва ясхинь күләв. Зуг Орловд однав гиж әәлһснә хөөн, тер дарунь ирәд кеж өгв.
Эн төрәр "Восточный" нертә залврин компаня директор Вячеслав Ульцинов хәрү өгв. Энүнә цәәлһсәр, эн микрорайонд цуг әмтн эврәннь төрмүдин тускар ахлачнрт медүлж чаджахш.
Ода Әрәсәд коммунальн халхар хүврлт кегджәсн кемд, энүнд олн улс орлцжана. Тегәд чигн олн давхрта гермүдин комитетмудын ахлачнр коммунальн төрмүдиг йир сәәнәр меддг болв. Ода иим ахлачнр специалистнрас сәәнәр ЖКХ-н төрмүдлә таньлдв. Иим сән кергиг харһлытн йовудт бас темдглв. Үлгүрнь, Вера Шулбурова кесг жилдән коммунальн халхин һардачнрла күүндәд, жилишн заканла ирлцәтә олн улсин зөв болн даалһвр сәәнәр меднә. Вера Шулбурован келсәр, кедү дәкж эрлһн орулж өггдлә. Роспотребнадзор иим төрт оньган өгх зөвтә.
Келхд, харһлтын йовудт олн-зүсн сурврмуд өггдв. Дула олзлсн квитанцас авн олн давхрта гермүдин өөр бәәх бичкдүдин плошадкс болн эргндк аһу кен ясхин туск төрәр күүндвр һарв. Иим көдлмш ода зуг залврин компань кех зөвтә. Тер мет өдгә цагт иим компаньс дула болн электрокүч олзлһна кемжә бичж авхмн. Мэрйин толһачин зәнглсәр, “Энергосервисин” тариф өсснә туск йовдл шинжлж бүрткжәсн кемд, элстихн урдк тарифар мөнг өгх.
Колдан Наталья, Хулхачин Николай
