Элстин администрацин толһачин мөрә дәәнә ветеранмудт бәрүлж өггдв
Алдр Диилврин байрин өмн дорас өсж йовх баһчудт төрскнч сурһмж өглһнә кергт ик тәвцән орулсн төләд арвн дәәнә ветеранд Элст балһсна администрацин толһачин мөрә болн диплом бәрүлж өггдв. Ветеранмудыг мәрийн сүүрин залд йөрәв.
Мадниг дахсн хөвин сүүдр ода күртл мадниг дахжана. Эн шүлгүдиг дәәнә ветеран Андрей Джимбеев бичсмн. Бичәч, шүлгч, Элст балһсна күндтә гражданин. Күндтә ветеран талдан медәтнрлә хадман дорас өсж йовх баһчудт эврәннь байн дамшлтан өгчәнә. Догшн дәәнә жилмүд тодлхла ветерана нүднәс заядар нульмсн асхрна. Болв баатр-зөрмг салдс нульмсан әмтнд үзүлхәр седжәхш.
Андрей Манганыкович Элст балһс харсж авсн хөрн нәәмдгч әәрмин ор һанцхн әмд үлдсн салдс болжана. Энүнә өрчиг олн правительствин ачлврмуд кеерүлжәнә. Эднәс хамгин үнтә ачлврнь — Элст балһс сулдхсн дәәлдәнд авсн ачллвр болжана. Ода Элст балһснд зун арвн хйор төрскән харсгч дәәнә ветеран бәәнә. Эднә ик зууһин эрүл-менднь муурв, мууһар сонсна, нүднә харань баһрв, зәрмнь әрә гиж көл деерән зогсжана. Тер бийнь эдн сурһульчнрла харһлтс кеһәд, төрскән харсгч дәәнә туужин тускар келж өгчәнә. Бичкддүин өөр бәәхлә ветеранмуд баһрсн болж медгднә. Дәәнә жилмүд иим цагт ода болсн болж медгдж, ухан-серләс һархш.
Дәәнә ветеран Сергей Петрушкиевин келсәр, дән эклснә түрүн өдриг ода күртл йир сәәнәр тодлна. Өрүн эрт дөрвн часла бригадир ирәд, дән эклв гиж зәнглв. Фашистк Германь мана орн-нутгур дәврж. Цуг әмтн төрскн һазран харсж авхин төлә босх зөвтә. Арвн зурһан настадан фронтд тусв.
Дмитрий Бабаков, Федор Благодарный, Очр Болдырев, Григорий Василенко, Андрей Джимбеев, Роза Зольванова, Петр Леонтьев, Сергей Петрушкиев, Алексей Пихтуров, Григорий Татарченко. Эднл бидн цугтан алдр Диилвр бәрснд ик ханлтан өргжәнәвидн, баһчудт төрскнч сурһмж өгчәхд бас ик ханлт өргх кергтә.
Элст балһсна дәәнә болн күч-көлснә ветеранмудын хүүвин ахлач Убуш Бембеевин келсәр, дорас өсж йовх баһчудт төрскнч сурһмж өглһн тана хойрдгч фронт болжана. Баһчудын иргчин тускар ухалх кергтә. Цуһар амр-менд бәәтн гиж дурджана. Бичкдүдт дөн болад, чик хаалһар йовхинь зааж өгтн.
Шин ачлврмуд авсн ветеранмудыг болн өөрджәх Алдр Диилврин байрла эдниг йөрәхәр Элтс балһсна хөрдгч школын сурһульчнр ирв. Блиц эн сурһульч цуг дәәнә ветеранмудыг алдр Диилврин байрла йөрәжәнә. Ут-нас наслж манна-тиньгр бәәтн гиж йөрәжәнә.
Элст балһсна мэрийн толһачин дарук Галина Васькина ветеранмудыг йөрәжәһәд, иигж темдглв. Тадн цецн ухата медәтнр мадниг жирһлин хаалһар йовулж, дорас өсж йовх баһчудт чик сурһмж өгчәнәт.
Элст балһсна администрацин толһачин дарук Галина Васькина келсәр, төрскнч сурһмж баһчудт өгчәх дәәнә ветеранмудыг күндлж йөрәлһн сән зангшалд хүврв. Эндр арвн дәәнә ветераниг күндлж йөрәжәнәвидн.
Дөгшн дәәнә һалвд орад, төрскн һазран фашистк деермчнрәс харсж авсн мана өвкнрин баатр-зөрмг йовдл баһчудт төрскнч сурһмж өглһнд сән үлгүр-үзмж болжана.
Елена Алексенко, Бадмаран Владислав
