Элстин 1 микрорайонд бәәх олн давхрта герт ясвр кесн бийнь, күцәх төр дала

Эн зургуд негдгч микрорайонд бәәх арвн хойрдгч тойгта гер сән ясврин хөөн ямаран бәәдлтә бәәхинь ил герч болжана. Энүнд хойр жил хооран капитальн ясвр кегдсн билә. Герин подвалд хог богар дүүрсн деерән энүнәс му үнр һарчана. Тегәд зунын цаг ирхлә олн зүсн хорхас энд хурхнь лавта. Герин бәәрн әмтнә орулж өгсн эрлһиг күн оньгтан авчахш.

Противогаз угаһар энүнд орх күн болһна эрүл мендтд әәмшг бәәнә. һан халун ирхлә энүнд хорха дала болна. Негдгч давхрт бәәх далн долан нас зүүж йовх күч көлснә ветеран Лидия Размазнина яһж цааранднь бәәхнь алн болжана.

Тиим халунла терз сәкч болшго дегт му үнр орна. Үүдмүдән, терзмүдән хаачкад гертән суухад бәәнәвидн, дәкәд эн медәт астма гемәр гемтнә.

Эн капитальн ясвриг эн бәәрн герин әмтн кесг жилдән күләсн билә. Герин деерк ораһинь сольгдх гиж әмтн күләжәсмн, кесг жилдән бәәх хуучн коммуникац шинрүлх саната билә гиж эн герин улс зовлнгарн хувалцв. Болв зуралгдсн көдлмш кегдсн уга билә.

Светлана Уланова олн жилдән эн герт бәәнә, герин ораһинь кесг жилдән соля дуга. Хур орхла һүрвдгч давхр күртл усн һоожна.

Кесг дәкч бидн эн герт бәәх улс арһлачнрт цаас бичәд ясврин көдлмш күцц кевәр кетн гиһәд сурсн биләвидн. Ясрин көдлмш кесн компань эднә бичсн цааснь оньгтан авлго тер кевәр юм кесн уга билә гиж әмтн келнә.

Әмтнлә харһсн хойр арһлач эн гериг ясврин хөөн эврән ирәд бичж авсмн гиж әмтн келв. Ясврин көдлмшин дуту дундснь чиклтн гиж әмтн сурв, болв көдлмш ормасн көндрсн уга билә. Арһ уга болад бәәрн герин улс прокуратурт болн жилин коммунальн эдл ахун министерсвд эрлһ бичв. Эн жил эклснә авн дөрвн тиим эрлх эн министерствд орулгдв. Эн тускар бүртлһнә көдлмш кегдв.

Жилишн комунальн эдл ахун министерствин ахлач Владимир Налгировин келсәр цуг ирсн цаасн хәләгдв. Көдлмшән мууһар кесн ясврин компань ялд унх гиж министерствин ахлач келв.

Өдгә цагт шин закаһар ясврин көдлмш куцц кеснь бәәрн герин улс бүртлһ кех зөвтә.

Чуучән Валентина, Хулхачин Николай