Элстд саадгар халһна таңһчин келн-әмтнә 2-гч марһан давв
Элст балһснд саадгар халһна таңһчин келн-әмтнә 2гч марһан давв. Энүнд һуч һар улс орлчж чидлән сөрхцәв. Келхд, сүл жилмүдт эн спортд олн әмтнә оньг тусхагджана.
Хальмг деед сурһулин туужин әнгин оютн Мингиян Надбитовин Өвкнрин кезәнк авьясар саадг хадг авьясар соньмсллһн энүнә өөрхн улсиг зөвәр өврүлв. Юнгад гихлә эврә бәәдл-жирһлдән эн көвүн спортар икәр соньмсдго бәәсмн. Сүл хөйр жилмүдин эргцд болхла Ик-Буурл селәнд өсч-боссн эн көвүн балһсна болн танһчин марһаст орлцад, нүүрлгч орм эзләд, сән үзмж үзүлдг болв.
Тавдгч курсин оютн Мингиян Надбитов хамгин түрүнд саадг хадг монһл авьясла таньлдж соньмсдг болсмн. Школд педагогисческ дамшлтан өөдлүлжәсн цагтан саадгар хадг секцд әмт орулж авчахин тускар сонсад бичгдсмн. Эн йовдл Мингиянд зөвәр таасгдв. Монһлын саадг хадг спортин эв-арһ олимпийск нааднд ордг тоотас зөвәр йилһрнә гиж эн көвүн келнә. Марһана орлцач болһнд 18-н саадг өггднә. Дәкәд болхла эврән саадгнь, харвачнь онц гиж көвүн цааранднь темдглнә.
Хальмг танһчин саадгар хадг федерациг толһалжах Отхн Санджиев Элст балһснд түрүн марһа давулхин өмн кесг музеймуд эргж хәләһәд, дегтрин.сангмудт бәәх дегтрмүд умшад дала цаган давулсмн. Ода эн күүнә үзүлжәх саадг Монһлмуд арвн һурвдгч зун жилмүдт олзлж йовсн саадгла дигтә ирлцхәж юмн болжана. Цуг монһл келтнр кезәнә цагт иим зер-зев олзлж йовсмн. Саадг, бә бусх һазрнь цуһар шишлнг диг-дарата гиж Санж Отхонов цәәлһнә.
Саадг мет бә тусх һазрнь бас шишлнг эв-арһар кегддг болжана. Нег саадг кехин кергт өрәл жиләс авн хойр жил күртл цаг һарна. Урд цагт саадг зеергин өврәр чигн кегддг бәәсмн, олн-зүсн анг-аһрусна ясн бас олзлгдж йовсмн.
Эн соньн марһа хәләхәр насарн олн-зүсн улс ирсмн. Эдн дунд бөдүн улсиг чигн , баһчудиг чигн, бичкдүдиг чигн үзж болхмн бтлә. Эннь марһана бүрдәһәчнриг зөвәр байрлулв.
Күч-көлснә ветеран Иван Мучаев темдглсәр иим йовдл дорас өсч йовх баһчудт сән үлгүр-үзмж болхмн.
Марһанд орлцсн хамгин мергн улс диилвр бәрв. Эн тоот спортар олн жилмүдин эргцд соньмсч Саадг хадг эв-арһиг дорас өсч йовх баһчудт зааж медүлж йовх Шуурһн болн Отхн Санджиевихн нүүрт һарцхав. Жил даывад эн эв-арһин марһан дәкнәс давхмн. Тер цагт саадгар соньмсдг улсин то улм икдх гиж нәәлжәнәвидн.
Хавтхан Элла, Котина Валерий
