Элстд физкультурникүдин байр болв

Хальмг танһчин МВД-н “Динамо” ОВО команд танһчин толһачин кубок шүүж авв. Товчлгч нааднд эдн Көтнрчә района футболистнриг шүүв. Эн өдр мана танһчд физкультурникүдин байр болв. Энүнә йовудт олн-зүсн соньн болн зүткәтә марһас бүрдәгдв.

Футболистнр, ик чидлтә болн хурдг улс дииләчән йилһв. Марһа бүрдәсн Элст балһсна спортын, туризмин болн баһчудын комитет танһчин цуг ведомствст, муниципальн учрежденьст дөрлдәнд орлцх үрвр кев. Хальмг танһчин толһач Алексей Орлов спортсмепнмүдт диилвр бәрхинь дурдв.

Танһчин толһач Алексей Орловин келсәр, эн байрин өдр спортын болн физкультурин хамгин шунмһа орлцачнриг йөрәжәнә. Эндрк марһаст орлцжах цуг улсиг йөрәжәнә. Эрүл — дорул кевәр бәәдг авьяс делгрүлх кергтә.

Стадион олн плошадкст хувагдад, энүнә олн-зүсн спортар марһас болв. Хамгин түрүнд гиигн атлетикин спортсменмүд дөрлдәһән төгсәв. Келхд, профессиональн спортсменмүдлә хадман цуг әмтн дөрлдж чадв. Тер тоод хамгин бичкн спортсменкһучн доладгч тойгта зурһан наста Лиза Богославская нәәжнрләһән нег минһн метрт гүүһәд, дөрлдв.

Лиза одахн Казань балһнас ирв. Тенд Универсиад болсн билә. Гүүдлин марһанд Лизаг олн улс шуугж дөннв. Аштнь бичкн күүкн арвн зурһадгч орм эзлв. Нег минһн метрт болсн гүүдлин марһанд танһчин бичкдүдин олимпийск көрнгин спортивн школын командын элч Кристина Глушкова диилвр бәрв. Эн күүкн нег минһн метриг һурвн минутд хөрн дөрвн секундт гүүж чадв. Залу улс дунд физкультурин багш Сергей Иванов дарани рекорд тогтав. Энүнә күцәмжнь — хойр минут тәвн һурвн секунд. Тер саамд һарин чидлән сөрдг бөкнр дөрлдәһән эклв. Энүнд Данзн Бадмаев хамгин чидлтә болж һарв. Эн саамд Данзн бийдән тас шин чиннрүрт найн килограммин чиннүрт дөрлдв.

Армспортын мастерин кандидат Данзн Бадмаевин келсәр, һарин чидлән сөрлһнә марһан өвәрц болн шишлнг дөрлдән болж һарна. Энүнә күүнә цогцин чиннүр ик чинр зүүхш. Зун һучн килограмм чиннүртә күн зәрмдән шүүгднә. Энүнд техник ик чинр зүүнә. Марһанд эврәннь техникан олзлад, диилвр бәрв.

Келн-улсин спорт шаһа наадлһна марһаһар элчлв. Дөрлдәнә бүрдәһэчнр наадна таалыг гиигрүлв. Шаһар цокж һарһлһна аһуг баһрулж. Тер мет шаһар сәәнәр дошхин төлә ДВП делглсн бәәж. Энүнд орлцсн цуг улст шишлнг мөрә бүәрлж өггдв.

Шаһар наадна бүрдәһәч Санл Балабина келсәр, шаһа наадһлһна марһаг невчк гиигрүлж. Нааран ирсн әмтн шаһа наад медхш. Нег үлү, иим наадна дамшлт эднд уга. Тегәд наад гиигрүлв. Бичкдүд иим наадар икәр соньмсжана. Иим наадна дамшлт хоршаһад, иргчдән марһа бүрдәх селвг өггдв.

Зүткәтә марһана ашт командн дөрлдәнд “Динамо” нертә спортивн ниичәцән элчнр диилвр бәрв. Энүгәрн спортивн марһсас төгссн уга. Тер саамд Элст балһсна “Уралан” стадионд Хальмг танһчин толһачин кубокин марһана товчлгч наадн эклв. Энүнд “Динамо” ОВО болн Көтчнрә района Алцнһуд селәнә команд дииләчән йилһв. Наадана эклцәр динамо ниицәнә футболист Тимофей Горяев түрүн гол цокж орулв. Ут-тоодан нааднд Тимофей һурвн гол цокж орулв.

“Динамо” ОВО командын тренер Сергей Пода келсәр, эндр мана футболистнр сән наад үзүләд, диилвр бәрв. Нааднд футболистнр сән белдвр кев. Көтчнрә района команд бас йир сән. Эдн урднь Приютненск района Амтә Нур командыг диилсн билә.

Танһчин толһач ин кубок динамовцнр шүүж авв. Аштнь эдн Алцнһуд селәнә командыг 5:2 тооһар диилв. Тогтсн авьясар футболитснр Алексйе орловла зурган цокулв.

Танһчин толһач Алексей Орловин келсәр, футболд удрта әмтн Хальмг танһчд профессиональн футбол ирхинь күләжәнә. Невчк күләх кергтә. танһчин экономик күч авхла, мана нертә Уралан шинәс босхж авгдх. Тиигхлә профессиональн футбол ирх. Хальмг танһч — уралан. Иргчдән стадионд урдк кевәр олн улс ирәд, эврәннь дурта Уралан командыг дөннх цаг ирх. Энүнд бат нәәлвртә бәәнә.

Батан Санжрма, Хавтхна Анатолий, Мятежный Максим