Элстд цус авлһна керг-үүлдвр болв

Цусан өгәд — талдан улсиг харсж ав. Иим нерәдлһтә цус авлһна керг-үүлдвр болв — Энүг сар болһн бүрдәж давулна. Ода доноромуд дутжана, күнд гемтә улст болхла цусн кергтә болна. Мана танһчд гемтә улсиг эмнүлхин төлә нег жилдин көрнг гиж дөрвн тонн цус белдж авх кергтә.

Платон Бойченко эмчин эрдм дасжана. Донорск цусн гемтә улст эрк биш кергтәһинь йир сәәнәр еднә. Одахн арвн нәәмн нас зүүв. Эн өдр түрүн болж цусан өгчәнә.

Ростовск медицинск университетин оют Платон Бойченкон келсәр, радиоюһар иим зәнг сонсчкад, керг-үүлдврт орлцх дурн күрв. Түрүн болж цусан өгчәнә. Ода эрүл-менд күн цусад өгәд, талдан улсиг харсж авчана.

Цус авлһна керг-үүлдврин бүрдәһәчнрин темдглсәр, зунын кемд донормудын то зөвәр баһрна. Эннь олн әмтн зунын кемд амрлһнла залһлдата. Тегәд иим керг-үүлдврмүд иим цагт эрк биш кергтә. Энүг цуг Әрәсәд бүрдәж давулна.

Хальмг танһчин эврә дурар донорствин жиәсән делгрлтин специалист Баатр Анюшевин келсәр, иим керг-үүлдвриг дару-дарунь күцәнә. Энүнд тәв-жирн күн ирж эврә дурар цусан өгнә.

Эн өдр цусна цутхлнгд тәвн күн ирд цусан өгв. Эднә цусн гемтә улст туслх гиж эдн нәәлжәнә. Цус өглһн амр керг. Паспортан өгәд, анкет дүүргж бичх кергтә, энүнә хөөн цусан өгч болх. Цусиг арвн тавн минутын эргцд авна.

Специалистнрин келсәр, күүнә цогц-махмудт невчкн цус гееснь олз-туста болна. Энүнә ормд тер дарунь шин цусн һарна. Кезәнк цагт цус һарһад гем эмнүлдг бәәсмн. Иим олз-туста керг болсн бийнь, донормуд дунд нурһлж залу улс. Эн өдр цутхлнгд бас нурһлж залу улс ирв.

Виталий Паньковин келсәр, иим керг-үүлдврт кесг дәкж орлцжана. Талдан улст дөн күргхдән дурта.

Эндр өдрт танһчин цусна көрнгд кергтә цусна кемжән бәәнә. Болв энүг оньдин дүүргх кергтә болжана. Нег жилд гемтә улсиг эмнүлхин төлә дөрвн тонн цсн кергтә болна.

Хальмг танһчин эврә дурар донорствин жиәсән делгрлтин специалист Баатр Анюшевин келсәр, иим киитрүлд цусиг һучн градус киитнд хадһлна. Энүнә хөөн кергтә шинжлт кегднә. Зуг иим шинжлтүн хөөн медицинск учрежденьст түгәж өгнә.

Донор болсн әмтн талдан таньдго күүнд цусан өгәд, энүг харсж авна. Тегәд иим керг-үүлдврмүдт олн әмтн орлцхла сән болхмн.

Елена Алексенко, Котина Валерий