Элст Минеральные воды хоорнд самолет нисжәнә

Июль сард олн улс амрлһнд һарад, зуульчлһ кенә. Хальмг танһчин әмтн жил болһн Әрәсән курортмудт болн санаторьт одна. Ода танһчин улс кергтә һазртан ахр болзгт аһарин таксиһар күрч чадх. Июль сарин дундурас авн танһчин әмтн долан хонгт һурв дәкж Минеральные Воды балһснд нисж чаджана. Түрүн пассажирмуд шин рейсиг үнлж чадв. Ахр болзгт болн кимд үнәр курортн балһснд күрч болх.

Эн бичкн самолетар нәәмн күн нисж чадх. Түрүн пассажирмудын тоод Элст балһсна бәәрн күүкд күн Анна Черникова нисв. Урднь Минаральные Воды балһснд машиһар йовдг билә. Хол хаалһд тавн частан йовад, икәр зовдг бәәж. Нег үлү, хаалһ му болад күнд болдг бәәсмн. Ода болхла зуг нег часин эргцд кергтә һазрт күрч болна.

Анна Черникован келсәр, иим самолет нисжәхнь сән керг. Әмтнд эвтә болв. Жөөлн суудл бәәнә. Ода дангин иим самолетар нисх саната.

Келхд, нег частан нисх әмтн нег минһн арслнг өгнә. Иим кимд үн олн улст тааста болжана. Нег үлү Минаральн Воды балһсна эргнд бәәх санаторьт одх улст эвтә болжана. Болв иим өвәрц көлгн-күчнд ижлдх цаг кергтә. Эн күүнә темдглсәр, Элст балһснд иим рейс эвтә болжана. Тер мет Минеральные Воды балһснд Хальмг танһчин әмтн һазр хулдж авад, эврәннь кергән секх зурата. Эн күүкд күүнә келсәр, йир сән керг. Ода автобусар кесгтән йовх керг уга. Самолетд сууһад ахр болзгт кергтә һазрт күрч болх. Йир байрта бәәнә.

Аэропортын көдләч Майя Евстигнееван келсәр, ода аэровокзалд күн баһ. Һучн жил хооран энд олн улс ирдг билә. Тиигхд зунын кемд өдр болһн Элстин аэропортас һучн самолет нисдг бәәсмн. Тер мет танһчин райодын зәрм цутхлнг поселк күртл самолет нисдг билә. Тер цагт Воронеж, Липецк, Харьков, Одесса, Сочи балһсдт самолетар нисж күрх арһ бәәсмн. Хамгин олн улс Москва балһснд нисж күрдг билә. Пассажирмудын тоолврар, хотл балһсна аэропортас нарта-делкән рейсмуд күцәж болх. Ода авиакомпань шишлнг дисконтн тарифмуд орулжана. Оютнр болн пенсионермуд билетиг жирн долан процентд баһар хулдж авч чадх.

Элстин аэропортын көдләч Майя Евстигнееван келсәр, самолетд нәәмн күн нисж чадна. Салон ке-сәәхн, эвтә суудл бәәнә. Минаральные Воды балһсн күртл дегд хол биш. самолет нег часин эргцд күрнә. Адһжах улст иим рейс йир эвтә болжана.

Онц келхд, август сард Элст-Ростов-на-Дону балһсн хоорнд бас самолет нисхмн. Иим региональн аһарин маршрут Әрәсән правительствин тогтаврар күцәгджәнә.

Ээнән Ольга, Бадмаран Владислав