Элст балһснд дворникүд дутжана

Эднә көдлмш күнд болсн деерән әәмшгтә. Өдгә цагт иим көдлмш дала. Ода болхла, әмтн бәәдг эздүдин гермүдин ниицән үүлджәх цагт дворникүдин көдлмш улм күндржәнә.

Элст балһсна дөрвдгч микрорайонд Любовь Дуданова арвн жилдән герин эргндк аһу цеврлдж ахулжана. Зунын кемд герин подьезд дотр уһаж арчна, намрин кемд модна хамтхас һаза хурах кергтә болна. Нег үлү үвлин кемд хамгин күнд болна гиж күүкд күн зовлнгарн хувалцна. Киитн өдрмүдт цасн орсн кемд өдр болһн цас хураж авх кертгә болна, нег үлү олн давхрта нег герт зурһан подьезд бәәнә. Күнд лом болн күрз авад, цаснла ноолдна. Любовь Дуданован келсәр, ода цасн орв, тегәд көдлмш күндрв. Көрсн цас хураж авхд жанһрта болжана.

Энүнд йилһж өгсн эргндк аһу цеврлхин төлә дворникд зурһан-нәәмн час кергтә. Тер мет долан хонг болад, хог-бог зөөдг маши кесгтән күләһәд, хог-бог хайсн баакмуд цеврлх кергтә. Иим күнд таалд көдлжәсн улст, герин бәәрн улс бас эднд боомтг учрана. Хог-боган баакд күрглго, плошадкд үлдәнә. Плошадкин терз-үүд хамхлад, бузрдана.

Элст балһсна зәрм бәәрн улс энд-тенд хог-бог хаяд, дворникүдт му нилчән күргнә. Тер мет иим көдләчнрин жалвнь дегд бичкн. Тегәд чигн иим күнд болн жанһрта көдлмшт зәрмнь удан төрхш. Нег үлү, иим көдлмш нурһлж медәтә әмтн күцәжәнә. Баһчуд болхла иим көдлмш кехәр седхш.

Мастер Любовь Калашникован келсәр, дворникин көдлмш йир күнд болсн деерән, жалвнь йир баһ. Эднә жалв дөрвн минһн шахуд күрнә деернь хөрн процент немж өгнә.

Ода дундлад дворникин нег сарин жалвнь дөрвн минһн долан зун дөрвн арслнг тогтажана. Иим кемжән дегд бчикн. Иим күнд болн дааврта көдлмш кежәх улст эннь йир бичкн мөнгн болжана. Тер бийнь дворникүд эврәннь хөвдән, унджахш, эврәннь көдлмшән өдр болһн кех кергтә болна.

Азыда Надежда, Бадмаран Владислав