Элст балһсна школд МЧС-ин көдләчнр шишлн кичәл кев

Бачм чинртә бәәдл тогтхла, нег үлү түүмр шатхла зуг бичкдүд биш бөдүн улс чигн үүмнә, зәрмдән чигн ю кехән медхш. Тегәд иим бәәдләс саглулхин төлә Элст балһсна һурвдгч тойгта школд МЧС-ин көдләчнр шишлн кичәл кев.

Бачм чинртә бәәдлин ә сонсчкад, цөн минутын эргцд школд бәәсн әмтн һазаран гүүж һарв. МЧС-ин көдләчнрин темдглсәр, шүүмр шатсн һазрас әмтн харслһна көдлмг сәәнәр давв. Тиим керг-үүлдвр жилдән хойр дәкж давулгдна.

Бачм чинртә министерствин инспектор Бадм Бадмаевин келсәр, онгдан тиим көдлмш 5-6 минутын эргцд болна, эндр болхла әмтн 4 минутын туршарт энүг кеж чадв. Эннь йир сән.

Эвакуацин хөөн харсачнр көвүд-күүкдт соньн лекц давулв. Энүнд авсн медрл бачм бәәдг тогтхла зуг эднд биш талдан улст чигн туста болх. Хамгин түрүнд үүмх керг уга, энд авсн медрлин тускар ухалх кергтә.

Сурһульч Владимир Сангаджиевин келсәр, бичкдүд хустгар наадх керг уга. Эннь йир әәмшгтә. Маша Кошель темдглсәр, шүүмр шахла үүдн секх керг уга, наадһасан харсх бас керг уга.

ОБЖ-н багш Николай Кукаевин тоолврар, энд авсн медрл йир туста. Сүл цагт Крымск балһснд болсн усна аюл болн кесг һал түүмр шатсн йовдлмуд иим бәәдлд бийән яһж бәрдгин туск сана маднд орулна.

Эвакуацин көдлмш Элст балһсна һурвдгч тойгта школд сәәнәр давв. Энүг 4 минутын туршарт күцәв. Цаарандан чигн тиим көдлмш күцәх зура бәәнә. Нег үлү, эн кичәлмүд бичкдүдт йир таасгдна.

Дмитриеван Татьяна, Очра Сергей