Элст балһсна нег өрк-бүл хамдан жирн жилдән бәәжәнә
Элст балһсна Титовин нертә уульнцд олн жилдән бәәх Иванкиевихнә өрк бүл эн өдрмүдт очр чолун хүрмән темдглхәр бәәнә. Кесг жилдән Лидия Шиповна болн Борис Шапкиевич нег негндән түшг болад, дурта иньгтәһән очр чолун хүрмдән күрсндән эдн олн бурхсд ханлтан өргж зальврна. Келхд, ода мана танһчд иим өрк-бүл ховр.
Хавстн нурһндан түшг, нурһн хавсндан түшг метәр Борис Шапкиевич болн Лидия Шиповна Иванкиевихин жирн жилдән хамдан бәәнә. Эн цагин эргцд кедү зовлнг үзссн болв чигн хамдан ни негн кевәр нег негән дөннәд цугнь диилж һарв. Бичкдүдин герт өсч боссн Лидия күүкн бичкн дүүһән авад төрл садан хәәһәр талдан балһснд одсн билә. Зовлнгта тәвдгч жилмүдт хальмг улс дала зовлнг эдлв, комендатурд дангин одхд кергтә билә. Тер күнд цагин тускар Лидия Шиповна халун нульмсан асхрулад маднд келж өгв.
Нег асхн Баһ наста лидия үр күүктәһән клубд ирәд баһ наста хальмг көвүтә таньлдв. Дигтә тер цагт Борис Шапкиевич көдлмшин халхар ирсн билә. Тер цагасн авн эндр өдр күртл эдн нег негнәсн салхш.
Күн үрнәннь төлә, хөн сүүлинь төлә гиж келдмн.Борис Шапкиевич болн Лидия Шиповна эндр өдр тавн үртә. Ода эдн цуһар олн дунд тоомсрта улс болад танһчиннь бәәдл жирһлд шунмһаһар орлцжана, эк эцкән байрулад , ик ханлт өргжәнә.
Иванкиевихн 60 жилдән хамдан бәәнә. Эднә бәәдл жирһл баһчудт үлгүр болх зөвтә. Юнгад гихлә сул цагт баһчуд өрк бүлән тогтаһад удан бәәлго сална-эн йовдл медәтнриг һундана.
Ик кезәнәс авн хальмгуд ээж аавасн үлдәсн авьясмудан йир нәрнәр бәрәд йоста кевәр хадһлад үрдүдтән зааж өгдг бәәсмн. Өнр өсклн Иванкиевихнә өрк бүл олн жилмүдин эргцд кен ахан күндлж кен дүүһән энкрүлж эк эцкән сүв селвг сурж тевчж бәәнә.
Кесг жилдән нег негндән түшг болад дурта иньгтәһән эрднь чолун хүрмдән күргсндән Борис Шапкиевич болн Лидия Шиповна олн бурхсд ханлтан өргж зальврна.
Дурни залиг әрүнәр хадһлж йовх Иванкиевихнә өрк бул дорас өсч йовх баһчудт, 15 ачнр зеенртән болн 14 жичнртән үлгүр болж, цааранднь ут нас наслж, күүкдтән нүдн амн болж йовхнь олн деедс эвәтхә.
Аджин Светлана, Котина Валерий
