Элст балһсна кинотеатрмүдт «Шпион» нертә кино үзүлгджәнә

Кезәнәс авн олн хәләһәчнрин күләжәсн «Шпион» нертә кино Элст балһсна кинотеатрмүдт үзүлгджәнә. Эн кино бичәч Борис Акунина бичсн «Шпионский роман» гидг үүдәврәр тәвгдсн болдг.

«Шпион» нертә кинод төрскән харсгч алдр дәәнә тууж үзүлгджәнә. Ямаран һашута күнд жилмүд болвчн олн-әмтн тер цагин гүүдләр бәәх зөтә бәәсмн. тегәд йирин бәәдл-жирһлд учрдг йовдл кинон йовудт тодрха кевәр үзүлгджәнә. Кинон зәрм йовдлмуд тер цага Москва балһснд хаврин цагт давжана. тегәд кино хәләхәр ирсн әмтн Москван тер цага бәәдлиг үзж, тодлж чадхмн.

Хәләһәч Хонгр мутренов Борис Акунина бичсн тоотиг таасч умшдг күн болжана. «Шпионский роман» — гидг дегтринь школд сурч йовсн цагтан умшсн болдг. Тегәд дигтә эн дегтрәр тәвгдсн кино Элстд үзүлгджәнә гисн зәнг сонгсад хәләхәр ирсмн.

Умшсн дегтр, үзсн кино хоорнд зөвәр дала йилһвр бәәдг болвчн кино нанд йир таасгдв. Нег үлү кинод орлцсн актермуд Данил Козловский, Федор Бондарчук ахта нертә улс болжана. Дүрмүдән эдн сән кевәр үзүлв гиж Хонгр Мутреноа ухан-тоолврарн хувалцна.

Урднь Борис Акунина бичсн дегрт умшсн улс кинон халхин чинрнь темдгтәһәр сольгдсинь темдглцхәв.

Шин кинон үзүллт мана хотл балһснд долан хонг хооран эклсмн. Әмтн эн кино хәләхәр олар иржәнә-гиж кинотеатрин контролер Екатерина Кобылина келнә.

Кинон үзүлгджәх тоотин төрнь соньн болсн деерән энүнә йовудт өдгә цага йовдлла ирлцжәх кесг тоот бас орулгдсмн. Тегәд эн киног ик-бичкн уга цуһар хәләж чадхмн.

Азыда Надежда, Джамбин Дмитрий