Элст балһсна хургин сүүрт бюджетд сольгдв

Элст балһснд хотл балһсна хургин дарани сүүр болв. Депутатнр ут-тоодан арвн тавн төрәр күүндвр кеж, ирлцнһү шиидврмүд батлж авв. Сүүрт эн жилин бюджетд сольвр орулгдв. Хотл балһсна хазнд жалвин кемжәнә, коммунальн туслмжин мөнгин халхар чиклвр кегдв. Сессин тускар тодрхаһар мана түрүн сюжетд келгджәнә.

Элстин мэрийн финансин зааллтин ахлачин дарук Юлия Алакшанова шинкн экләд үг келхәр седхлә, энүг Игорь Деревенченко зогсав. Энүнә келсәр, эн жилин бюджетд сольвр орулһна туск төр бюджетн комитетд дөннгдсн уга.Энүнә хөөн депутатнр эн төрәр тодрха цәәлһвр өггдв. Игорь Деревенченко келсәр, бюджетн көдләчнрт жалв немх кергтә, коммунальн туслжмин мөнгә кемжәһәр сольвр кергтә.

Эн төрәр, тер толд жалвин, коммунальн туслжмин мөнгнә төрмүдиг хооран саах керг уга болж һарв. Дәкәд болхла бачм чинртә медицинск дөн күргдг машидын бензиһар тетклһнә төр бас хурц гиж Элстин хургин нег депутат темдглв. Тер мет иим машидт шин жилин байрин өдрмүдин хөөн бас бензин кергтә болх, хог-бог зөөж һаһрх кергтә болжана. Депутат Павел Симаковин келсәр, иим сольвр экр биш орулж авх кергтә. Эннь олн улст эрк биш кергтә туслмж.

Бензина болн дизельн түләнә үн өсәд йовв чигн, эн халхар бюджетин һаруһин халхиг көндәшго шиидвр авгдв. Сүүрин ашт “Элстин панорама” газетин туск төр хәләгдв. Эн газетин редакц нәәмн зун минһн арслнга цаас өгьяһар хулдж авч. Депутта Мергн Бадма-Горяевин тоолврар, иим хулд кех керг уга бәәсмн. Бюджет батлж авгдад уга бәәтл эннь хажһр шиидвр болв. Депутат Мергн бадма-Горяевин келсәр, мөнгн уга болхла, газетиг хаах кергтә. Бюджетин мөнгн уга болхла, яһад иим ик өр эдн кесмб? Эннь бюджетин зака эвджәх йовдл болжана.

Тер бийнь депутатнр эн туст бас сольвр орулхар шиидв. Сүүрин ашт хотл балһсна улст эрк биш кергтә сольвр бюджетд орулгдв. Талдан ик чинр уга төриг хөөннь хаһлх шиидвр авгдв.

Колдан Наталья, Колдан Церн