Элст балһсна алвна инспекц алвна мөнг орулх саната улсла харһлт давулх
Элст балһсна алвна инспекц эндр болн манһдур алвна мөнг орулх саната улсла харһлт давулх. Күн болһн эврәннь һазрин, өлг-эдин болн машина алвна мөнгнә кемжәнә болн болзгин тускар медж чаджана. Дуту дундс илткхлә, дор ормднь эрлһ бичж чаджана. Эн алвна мөнгн балһсна бюджетд орулгдна. Жилдән нег дәкж өггднә, энүг ноябрин нег шин күртл хаах кергтә. Ода 2011-гч жилин алвна мөнгн цуглулгджана. Келхд, одахн Федеральн алвна церглтин һардачин дарук Светлана Бондарчук "Россия 24" нертә телеканалд интервью өгхләрн Хальмг танһчд өлг-эдин алвна кемжән мана орн-нутгт хамгин ик гиж темдглв, эн ут-тоодан 1З00 арслн тогтажана. Тер мет Москва балһснд эн алвна кемжән 800 арслн, Санкт Петербурсгд энүнәс баһ болна. Тиим ик балһсдт әмтн бәәдг гермүдин рыночн үн Элстин үнәс даву болдг болвчн мана танһчд өлг-эдин алвна мөнгн зөвәр ик. Элстин алвна инспекцин көдлчәнр цәәлһсәр герин эс гиж патьрин алвна мөнгнә кемжә инвентаризацин үнллә ирлцж диглгдх зөвтә. БТИ-н көдләчнр гер болһна үниг цуг орн-нутгин тиим халхин диг-дараһар диглж алвна инспекцин хайгар йовулх зөвтә. Алвна мөнгнә кемжә шишлн ставкас тогтна, терүг муниципальн органмуд диглнә. Элстд терүг балһсна депутатнрин хург шииднә.
