Элст балһснд медәтнрин хүрм болв
Элст балһсна медәтнрин гер-интернатд һуврн хүрм болв. Энд көгшдүд талдан улсла әдл нег-негән дурлад, өрк-бүлән тогтана. Насн дииләд ирв чигн, зурһан күн өрк-бүлән тогтахар шиидв. Энүнә төлә ЗАГС — ин көдләчиг нааран дуудв.
Далн жил һарсн медәтнр эврәннь хөвән олж авдгнь бас күн болһнд учрхш. Зуг эн зурһан күүнд жирһлин хаалһднь йоста байрта йовдл учрв. Александр Дорджиев болн Вера Очирова эн жилин май сард медәтнрин гер-интернатд таньлдв. Александр Муборанович нааран ирснә хөөн хойр өдр болад эдн таньлдж. Тер цагас авн эдн оньдин хамдан бәәнә. Медәтә күргнә нүднә харань му. Тегәл Вера Цереновна энүнд көдләч болн нөкд болжана.Ода болхла йосн кевәр авальнь болв.
Александр Дорджиевин келсәр, нааран майин арвн хойрла ирж. Нег өдр болад Вера Очировала таньлдв. Харһад күүндж. Тер цагас авн хамдан бәәнә. Хой р күүнд бәәхд невчк амр болна. Вера Очирован келсәр, һанцхн күн му. Хамдан бәәхлә сән болна.
Эдн шинкн өрү-бүлән тогтасн болхла, Раиса Файзулина болн Бата Босаев хамдан хөрн хурһан жилдән бәәжәнә. Эндр эднә апспортд тииз тәвснь зуг хоосн темдг. Эднә дурна тууж найн доладгч жилд эклсмн.
Раиса Файзулина келсәр, паспортд эрк биш тииз тәвх кергтә гиж директор келв. Ода йосндан өрк-бүл тогтахар шиидв. Ода гем уга сән бәәнә. Авалиннь зангнь сән. Төвшүн зангта күн.
Медәтнрин гер-интернатд болсн хүрм талдан хүрмәс йиһрсн уга. ЗАГС-ин көдләч ирв, бильцг, морджах күүкүд күүнд цецгүд бәрүлж өгв, һашун гиж эднд хәәкрв. Эндр өдр медәтә улст хүрмин ик байр болжана. Александр Жуйков болн Елизавета Давлетова иим байрта йовдлыг бүкл жилдән күләв. Бичкн хатмл күүкд күн болн инвалидн тергәр йовдг күн нег негндән түшг болсн деерән, йоста дурн эднд ирв.
ВХүрмин өдр өрк-бүлән тогтасн улсиг эднә өөрхн улснь ирж йөрәсн уга гиж эдн һундлтаһар келнә. Энүнә учрнь медгджәхш. Эднә элгн-саднь цол уга болад эс ирсмн аль көгнш эк-эцкнртә оньг тусхашго седклтә бәәхмб? Медгджәхш. Александр Дорджиевин келсәр, элгн-садн геедрв. Эдниг үзхш. Дөрвн күүктә. Эдниг эк угаһар өскж. Дегд һундлта. Зурһан сарин эргцд нег чигн күүкн ирсн уга, жиннүлсн уга.
Ода Элстин медәтнрин гер-интернаид зун найн күн бәәнә. Эднәс тавн өрк-бүл тогтагдв. Эднә төлә салу хора йилһж өгв. Энүнд шин өрк-бүл эврәннь бәәцән тогтаж чаджана, нег негндән дөн болж чадх.
Элстин медәтнрин болн инвалидмудын гер-интернатын директор Хатимулла Идрисовин келсәр, йосн кевәр өрк-бүл тогтагдв. Эдн Әрәсән закаһар өрк-бүлән темдглж бичв. Эднд салу хора өгв. Энд өрк-бүл тогтасн йовдл гер-интернатд жирһл цаарандан давжана гисн темдг болжана.
Дурнд насн харш болхш гиж әмтн келнә. Медәтнрин герт болсн байрта йовдл энүнд ил герч болжана. Эднә келсәр, өрк-бүлән тогтаһад, хөвтә жирһл эдлх саната. Ода эдн нег-негндән түшг болад, күнд түрү хамдан дааж һарх.
Елена Алексенко, Мятежный Максим
