“Единая Россия” партин сьезд болжана
Москва балһснд “Единая Россия” партин дарани арвн дөрвдгч сьезд болжана. Энүнд делегатнр сентябрин нәәмнд болсн сунһврин аш диглгдв. Сунһвр Әрәсән цуг регионмудт болв. Эн саамд сунһвр амр биш болв. Ода Әрәсәд үүлджәх талдан партьс эн политическ керг-үүлдврт шунмһаһар орлцж, зәрм регионмудт сән аштаһар көдлв. Хальмг танһчин олн-әмтнә хуралд хөрн долан депутатас арвн нәәмнь “Единая Россия” партин гешүд. Сьездин йовудт бичкдүдин садмудын төр болн өнчн көвүд-күүкдин төрмүд хаһлгдв. Өнчн бичкдүд өрк-бүлмүдт бәәх зөвтә. тер мет бичкдүдин садмуд тосхж, энд ясвр кеж, немр орм секх кергтә болжана. Бичкн көвүд-күүкдин төлә спортар көдлх цуг таал бүрдәх кергтә, эднә эрүл-менд батрулхин төлә өөмлһнә бассейн бәрх кергтә. Дәкәд болхла сьездин делегатнр Әрәсән Президентин закан яһж күцәгджәхин тускар күүндвр кев.
