Эдин кизәр олзлад урн һарта күүкд күн сәәхн кегдлмүд кенә

Эдин кизәрәс кесн кегдлмүдиг зәрм әмтн шоглад, һару уга производств гиж келнә. Өрк-бүл болһнд күүкд улс хувц-хунр уяд энүнәс олн кизәрмүд үлднә. Иим кизәрмүдиг күүкд улс хайхш. Болв энүг яһж олзлзхин тускар эднә зәрмнь медхш.

Людмила Коробцева иим эрдмәр көдлхдән йир дурта. Ода эн күүкд күн олн-зүсн кизәрәс кегдлмүд кеж һарһна. Зуг ачта амрлһн һархларн дурта эрдмдән олн цаг тусхадг болв. Өдгә цагт иим дөрвн зун өвәрц үүдәвр кеж һарһв. Людмила Тимофеевна келсәр, энүнә дурта печворк нертә үүдәлт йир олз-туста болжана. Нег үлү, иим үүләр цуг күүкд улс көдлж чадх. Арвн жил хооран бичкн кевс кеж һарһв. Энүг тер дарунь эврәннь элгн-садндан белглв.

Эрдмчин тоолврар, хувц-хунр ишкәд уйдг сурһуль бас туста болв. Болв энүнә түрүн көдлмш дегд сән болсн уга. Бичкн кевс дегд сәәхн болсн уга, зуг хөөннь эрдмч күүкд күн эврәннь үүдәврән улм сәәнәр кехәр зүткв. Өдр болһн иим кегдлмүд кехин төлә һурвн-дөрвн частан көдлх кергтә болжана. Ода болхла Людмила Коробцован урн һарар кесн сәәхн кегдлмүд энүнә нәәжнрин, элгн-саднаннь, тер тоод талын һазрас улсин геринь кеерүлжәнә.

Людмила Коробцован келсәр, иим кегдл таассн цуг улст иим белг кенә. Нег үлү сәәхн кегдлмүд удан герт кевтхлә, му болна. Энүг эрк биш белглх кергтә болжана.

Коробцован келсәр, иим керг дасхин төлә ик дамшлт керг уга. Эврәннь һарарн ке-сәәхн кегдлмүд кеһәд, олн улст байр үүдәхлә, энүнәс сән юмн уга болна. Иим машинкин дөнгәр Людмила Тимофеевна эврәннь ухалж авсн үүдәврмүдән кеж һарһна. Тегәд чигн ода олн-зүсн өнгтә болн кемжәтә кевсмуд кенә. Людмила Коробцован келсәр, иим көдлмш ик нөкд болна. Ода найн нас күрч йовна. Кемр хара суухла йир күнд болх. Дурта эрдм бәәхлә цаг дарунь өнгрнә.

Шин кегдл кеһәд, һархла, хөөннь энүнәс улм сәәниг кех дрн күрнә. Олн-зүсн кизәриг олзлад, ямаран үүдәвр санан орна. Ода Людмила Коробцова дарани кевс кеж һарһжана. Ода эн үүләвр ямаран болхин тускар зуг эрдмч күүкд күн меднә.

Ээнән Делгр, Очра Сергей