Дула өглһнә мөнгн январь сард кесг холванд өсв
Дула олзлсн квитанц авчкад, элстихн икәр үүмәд бәәв. Коммунальн туслмжин мөнгнә кемжән январь сард кесг холванд икдв. Элстин дөрвдгч микрорайона бәәрн әмтн митингд һартн гиж дуудвр кежәнә.
Элстин дөрвдгч микрорайона олн давхрта гермүдин бәәрн улсин хургт әмтн коммунальн туслмжин квитанц авч ирж. Давн жилин декабрь сард дула өглһнә мөнгн кесг холванд өсж. Пенсионерк Мария Петровна нүднәс нульмсн һарад, медәт икәр үүмжәнә. Квитанц авсна хөөн зүркнь цокад му болв. Пенсионерк Мария Баянован келсәр, һурвн хората патьрт бәәнә. Ода һанцхарн бәәнә. Дула олзлсна квитанцд һурвн минһ һар арслнг ирж. Цуг мөнгән өгчкәд, яһж бәәхмб? гиж медәт зовжана.
Иим бәәдлд Элст балһсна цуг әмтн тусв. Эдн цугтан үүмәд, иим ик мөнг яһад бичсинь меджәхш. Дула өгснә дегд ик мөнг бичв. Давсн жиллә дүнцүлхлә дегд ик. Эн залу күүкнә келсәр, ода коммунальн туслжмин халхар дегд күнд бәәдл тогтв.
Энүнә тускар ЖКХ-н министр Нелли Ткачева цәәлһвр өгв. Энүнә келсәр, квитацнд бичгдсн жилишн-коммунальн туслжмин мөнгн чик. Энүг шинәс тоолж сольшго. Танһчин ЖКХ-н министр Нелли Ткачеван келсәр, давсн жилин февраль-март сармудт бәәрн әмтн тооцана прибормудар коммунальн туслжмин мөнг өгсн уга. Эдн дундлад дөрвлж метрт арвн хйор арслнг өгчәлә. Тегәд ик һару найн сай арслнг һарв. Энүнә тускар бүкл жилдән зәнглсн биләвидн. Шишлнг комиссь дуудж авх кергтә болв. Эдн тооца кедг прибормуд ирж хәләв. Прибормуд хажһр тооца кесн билә.
Тегәд ода танһчин әмтн дула өглһнә кемд коммунальн туслжмин мөнгиг икәр өгх. Дула өглһнә кем төгсхлә туслжмин мөнгнә кемжән баһрхмн гиж министр иткүлв. Баһ тетквртә өрк-бүлмүд болхла дөнцл мөнг авх. Министр Нелли Ткачеван келсәр, урднь әмтн мөнг баһар өгчәлә. Эннь эднә гем биш. Прибормуд иим тооца кеж. Баһтквртә өрк-бүлмүдт дөнцл мөнг өггдх. Жалвин кемжәнәс коммунальн туслмжин хөрн хойр процентинь өгчәх улс иим мөнг авхмн.
Коммунальн туслжмин мөнгнә кемжәнә туск төрәр Нелли Ткачева гермүдин комитетмудын ахлач болһнла харһад күүндж чадх. Тер мет эн төрәр бичг бичәд, цәәлһвр авч болх.
Арстана Светлана, Хавтхна Анатолий
