Дула олзлһна үн дегд икәр икдснә туск ЖКХ-н министерствин материалмуд прокуратурт йовулгдх

Давсн жилин ноябрь сард дула олзлһна үн дегд икәр икдснә учринь медж авхин туск региональн ЖКХ-н министерствин материалмуд прокуратурт йовулгдх. Энүнә тускар эндр министр Нелли Ткачева зәнглв. Иим бәәдл давсн жилд дулана кемжә тоолдг прибормудта олн давхрта гермүдт тогтв. Санкт-Петербург балһсна специалистнр орцата межведомственн комиссь иим прибормудыг шинжлж хәләв. Давсн жилин октябрь сар күртл авсн то-диг уга болж одв. Нег үлү, хойр минһн доладгч жиләс авн иим то-диг баһрулгдсн бәәж. Энүнд кен гемтәв? Иим прибормуд энергетикүд угаһар тектжәсн арһлачнр? Элстин «Энергосервис» эс гиж залврин компаньс гемтәв? Энүнә учрин мөшклһнә органмуд медж авх. Нелли Ткачеван келсәр, коммунальн туслмжин тарифмуд эн жил июлин нег шин күртл өсшго.