Дрэг-рейсингин чемпионат болв
Ода спортын туск зәнг. Троицкое селәнә өөр бәәх аэродромин аһуд дрэг-рейсингин марһан болв. Хальмг танһчд Әрәсән Өмн үзгин болн Ар Кавказин спортсменмүд ирж дөрлдв. Эн жил чемпионатд орлцх улсин то өсв. Хальмг танһчин кубок болн марһана һол мөрә -зун тәвн минһн арслнг кенд күртсн тускар мана сюжетд келгджәнә.
Хамгин ке-сәәхн оошг өнгтә Тойота машиһар Ставропольск крайин Новопавловск балһснас Эдуард Ким гүүлгж ирж. Энүнә машина күчнь — нег минһн мөрнә чидлтә. Турнирин орлцач Эдурад Ким келсәр, иим дөрлдәнд орхин төлә маши шишлнг белдсн уга бәәж. Иим автомобиляр өрк-бүләрн йовад амрч болх. Нааран ирәд чидлән сөрх саната. Ода чигн машинд кех юмн дала.
Кабардино-Балкарин команд дөрвн машиһар ирж. Эдн цугтан ик күчтә автомобильмуд. Иим машидин моторын күчн Ставропольск крайин гоншикин машинла әдл. Элст балһснд Борис Мальбахов эврәннь нәәжнртәһән һурв дәкж иржәнә. Түрүн ирлһндән эдн һурвн кубок шүүж авсмн. Иим марһанд кесг дәкж диилвр бәсрн спортсмен эн жил бас сән күцәмж бәрх саната. Борис Мальбаховин келсәр, дөрлдәнд дамшлтта спортсменмүд орлцжана. Эндр дөрлдән сән йовудтаһар эклв.
Хальмг танһчас марһанд Давид Бораев юолн Александр Слипченко орлцв. Давид Әрәсән машиһар гүүлгдв. Түрүн хәләцд гиигн Жигули машина өнгтә. Болв эн автомобиль хойр зун тәвн мөрнә чидлтә. Урднь Давил Бораев иим дөрлдәнд орлцсн билә. Ода призермудын тоод орх күцл өмнән тәвжәнә.
Гоншки Давид Бораевин келсәр, дөрлдәнә өмн икәр үүмдә бәәв. Тегәд чигн олн-зүнс эндү һарв. Ода энүг чиклх кергтә. Ирчгдән дамшлт хоршаһад, сән үзмж бәрх күцл тәвжәнә.
Марһанд дөрлдхин өмн спортсмен болһн хаалһар сәәнәр гүүлгхин төлә резиг халулна. Тегхд чигн дөрлдән болсн һазрт резина утан эргндк аһу бүркв.
Марһана зокалар спортсменмүд машиһар дөрвн зун хойр метрт дөрлдх зөвтә. Хамгин түргәр гүүлгсн күн диилвр бәрх. Машид дор ормасн түргәр гүүлгж һарчана. Дөрлдәнә зарһчнр спортменмдүин үзүлсн ашин тускар тер дарунь зарлж келж өгчәнә. Нааран ирсн улс болха маши болһниг шуугатаһр тосжана.
Хальмг танһчин автомотоспортын федерацин президент Арслнг Горяевин келсәр, иим марһан бүрдәхд, танһчин правительств, спортын министерств болн танһчин толһач сән нөкд болв. Гиичнрт сән таал бүрдәхәр зүткжәнә. Эднә төлә ик бүрдәмжин көдлмш кегдв.
Элст балһсна улс өрк-бүлтәһән нааран ирәд, сергмжтәһәр сул цаган давулж чадв. Танһчин правительств жил болһн болжг дрэг-рейсингин марһаг дөннх саната гиж танһчин толһач марһан орлцачнриг йөрәхләрн темдглв.
Алексей Орловин келсәр, эн жил марһана мөрән санг өсв. Иим спортд эннь сән мөрә болж һарчана. Нег үлү Әрәсән Өмн үзгин регионмудт эннь сән урмд өгх.
Дөрлдәнә орцлачнриг машина күчәр тавн класст хував. Класс болһн призермуд йилһрв. Цаарандан диилвр бәрсн спортсменмүд дөрлдх зөв авсмн. Хальмгин гоншикүд призермудын тоод орж чадсн уга. Дииләчнрт болн призермудт диплом болн үнтә белгүд бәрүлж өггдв. Диилвр бәрсн улс дунд Волгоград балһсна элч Олег Мироненко болн Кабардино-Балкарин спортсмен Борис Мальбахов йовна.
