Доржин Санж-hәрән көгжмин школын билгтнр концерт тәвв

Цуг өөрдж йовх байрмүдын өмн өргнд Доржин Санж-hәрән нер зүүжәх бичкдүдин көгжмин школын билгтнр эк-эцкнртән нерәдж соньн концерт тәвсмн. Эн байрта керг-үүлдвр Родина нертә цутхлнгд давв. Баһ наста билгтнр хальмг болн орс зевсгүд татч, ду дуулж би чигн биилж олн улсиг байрулв.

Доржин Санж-hәрә нер зүүжәх бичкдүдин көгжмин школын көвүд күүкд түрүн иим ик тәәз деер һарчана, зәрмснь невчкн эмәд бәәв. Баһ наста Болдра Эдуардын саксофон зевсг тавн килограмм татна. Болв Эдуард көвүнд эн күнд зевсг күнд болв чигн йир таасгдна.

Эмчин келсәр саксофон кииһән авлһнд йир туста болна, тегәд эк эцктәһән күүндәд көвүн эн зевсг шүүж авв. Баһ наста билгтн Экин келсәр эн зевсг хулдж авхд кесг цаг давб, талдан балһснд одад тенд хулдж авв, йир юнтә болв чигн көвүндән белгләд авлавидн гиж маднд эк келв.

Родина цутхлнгд ирсн цуг хәләһән баһ наста билгтнрин үзүлсн концерт таасгдв. Көвүд күүкд бииһин, дууна, зевсг татлһна билг эрдм үзүлв.

Көгжмин школын багшнр эк эцкнрлә хамдан ик урдаснь белдврин көдлмшән күцәв. Күүкдт ке сәәхн бүшмүд, көвүдт хар шалвр цаһан киилг уйлж, хулдж авб. Бичкдүдин ик зунь олн зүсн балһсна болн танһчин марһасин дииләчнр.

Келхд, эн керг үүлдвр бүрдәхд ик дөн нөкдән Элст балһсна мәрийн бичкдүдин үүдәлтин әнг көдләчр күргв. Кен медхв, эндр өдр эн бичкдүд эн тәәз деерәс экләд билг эрдмән үзүләд олн әмтиг байрулад йовхла, цааранднь һазадын орн нутгин ик концертн заалд хальмг танһчиннь нериг туурулж йовх.

Татьяна Гюзялян, Ирчин Алексей