Динамо ниицән ончта өөнән темдглв
Ода спортын туск зәнг. Динамо нертә цугәрәсән ниицәнә йирн жилин өөнд нерәдгдсн спортивн-концертн байр Уралан стадионд болв. Байрин программар уйн наста спортсменмүд билг-эрдмән үзүлв, нертә артистнр болн бииһин коллективмуд концерт белглв. Эн өдр танһчин толһач Алексей Орлов Людмила Гальченкод Әрәсән олимпийск жиәсәнә делгрлт ик ач-тус күргсн төләд нертә Әрәсән олимпийск комитетин күндтә темдг бәрүлж өгв. Байрин чилгчәр гиичнр болн элстихн лазерн шоу болн фейерверк һәәхв. Байрин тускар мана сюжетд келгджәнә.
Стадиона тал дунд шишлнг сценд ик герлтә установк углж тәвгдж, Динамо ниицәнә темдгтә торт болһж. Цуг эн тоот нааран ирсн улст ик өврмж болв. Динамо ниицәнә хөрн һурвн командын парад болв. Эннь бас ик ончта йовдл болсмн.
Байрин йовудт Динамо ниицәнд олн-зүсн белгүд бәрүлж өгв, бүлән үгмүд нерәдгдв. Танһчин физическ культурин делгрлтд ик тәвцән орулсн төләд ветеранмудт болн спортын шунмһа үүлдәчнрт санлые медальмуд болн күндлһнә һашгуд бәрүлж өггдв. Ода Әрәсән хамцу командын ханьд цуг спортсменмүдин һурвна кеснь нег хвүнь динамовцнр. Сүл олимпийск нааднд мана орн-нутгин спортсменмүдин шүүж авсн медальмудын ик зүнь эн ниицәнә спортсменмүд шүүж авла. Байрт Лондона олимпиадын чемпионк Алина Макаренко орлцад, спорт дурта улсиг байрлулв. Спортын халхар сән күцәмж бәрсн төлә Алина Макаренко цаһан бадм цецгин орденар ачлгдсмн. Энүнә тренер Людмила Гальченко болхла Әрәсән олимпийск жисәнә делгрлтд ач-тус күргсн төләд Әрәсән Олимпийск комитетин күндтә темдгәр ачлгдв.
Хальмг танһчин толһач Алексей Орлов Динамо ниицәнд Мерседес нертә микроавтобус белглв.
Танһчин толһач Алексей Орловин келсәр, Динамо ниицән ут болн байн туужта. Эндр ниицән ончта өөнән темдглжәнә. Эннь ниицәнә туужд шин халх болж үлдх зөвтә. Динамо ниицәнд оржах улсиг ниицән негдүлж урмд өгнә. Тер мет эднә өрр бәәх улст сән нилчән күргнә. Динамовнцр чанһ-чиирг, зөрмг болн диилвр бәрх күцл тәвдг спортсменмүд болжана.
Динамо ниицәнә бичкн оддуд болхла әмтәхн тортар тоогдв. Келхд, байрин торт өргндән нег метр, утдан хойр метрт күрв. Бичкн динамовцнр иргчдән эрк биш чемпионкин нер зүүх саната. Эн ниицәнә элчнр кесг дәкж алтн медальмуд шүүж авсмн. Йирн жилин эргцд ниицәнә хань батрад, өргжәд йовна. Тегәд чигн зун жилин өөниг эдн энүнәс улм сәәнәр темдглх зурата.
Динамо ниицәнә Хальмгин заллтин ахлачин дарук Игорь Гальченко келсәр, эндрк байрт Уралан стадион танһчин цуг спортивн коллективмуд ирж орлцжана. Иим байр спортсменмүдт немр урмд өгнә. Хальмгин Динамо кесгтән көдлх. Зун жилин өөнд дәкәд ииг цуглрад, хамдан ончта өөнән темдглх гиж санжана.
