Дигтә эн өдр далн негн жил хооран төрскән харсгч дән эклсмн
Дигтә эн өдр далн негн жил хооран төрскән харсгч дән эклсмн. Дөчн негдгч жилин июнин хөрн хойрла өрүн дөрвн часла фашистк Германь зар угаһар генткн Советск Союзд дәврәд орсмн. Дәәнә түрүн өдр мана орн-нутгин олн селәд-балһсд, төмр хаалһст, аэродромст бомб хайгдв. Немшин церг СССР-ин межә һатлад, мана орн-нутгин аһу эзлхәр дәврлһ кесмн. Иим кевәр төрскән харсгч дән эклв. Хальмг танһчин аһуд сүркә дәәлдән Яшкульск района Хулхт селәнә өөр болв. Хөрн нәәмдгч әәрмин баатр-зөрмг салдснр немшнриг мана танһчин һазрас көөһәд, Хальмг Танһч сулдхсмн. Далн негн жил болад, әмнәсн хаһцсн улсин санл тодлжанавидн.
Эндр өрүн хальмг танһчин толһач Алексей Орлов хуралын депутатнрла, һардачнрла Мөнк заль бумбд гүрмр цецгүд тәвцхәв. Хөөннь хальмгин толһач Алексей Орлов эн һашута өдрин тускар иигж келв: “Төрскән харсгч Алдр Дән өрк болһнд ик золвлн үлдәв. Эн өдрмүдт бидн цуг чидлән, әмән әврүллго әмнәсн хаһцсн цергчнрин санлынь тодлх зөвтәвидн. Мана хальмг улс аврлт уга дәәнд орлцад, бас ик нилчән күргсн билә”.
Энүнә өмн сөөһәр Элст балһснд “Санлын герл” нертә керг-үүлдвр болв. Энүг танһчин баһчудын олна жисәнә элчнр бүрдәж давулв. Зун хорһн шамас дән эклснә өдр темдглжәх хөрн хойр гидг то бичгдв. Мөнк заль бумбд эс ирж чадсн улс гертән хорһн шам шатав. Иим кевәр олн улс догшн дәәнд әмнәсн хаһцсн улсин санлынь тодлв.
