Дав зуур ик аца ачсн машид танһчин хаалһсар йовж чадшго
Мартын хөрн таванас авн апрелин хөрн тавн күртл региональн чинртә хаалһсар ик аца зөөдг машид дав зуур йовж чадшго. Хаврин кемд иим хаалһар йовж йовх машидын чиннүрнь темдглсн кемжәнәс давх зөв уга.
Иим олар йовж йовх ик аца зөөдг машидыг мана оператор Элст балһсна ар үзгин хаалһд цокж авч. Нег аца зөөж йовх машин эвдрәд зогсж. Энүнә жолач Анзор Бегановин келсәр, эн хаалһиг йир сәәнәр меднә, эн хаалһд нүкн болһниг сәәнәр тодлж арһул йовна. Жил болһн хаврар эн хаалһд дегд ик аца зөөсн машид йовшгон тускар меднә. Анзор Бегановин келсәр, кемр аца зөөсн цагт, цуг кергтә некврмүд экр биш күцәхвидн.
Иим кемд хааһлар ик аца зөөсн машид йовшгонь бас учрта. Һазр жөөлн болад, автомобильн хаалһиг иим ик аца зөөж йовх машид хамхлх әәмшг бәәнә. Тегәд кемжәнәс ик аца зөөж йовх машид региональн болн межмуниципальн чинртә хаалһсар йовж чадшго. Хальмг танһчин тосхлтын, көлгн-күчнә болн хаалһин эдл-ахун министерствин әнгин ахлач Александр Дорджиновин келсәр, зурһан тоннас үлү аца зөөдг машид йовж чадшго. Тер мет хойр көшүртә машид тавн тоннас давву аца зөөж болшго закан бәәнә. Һурвн көшүртә машид болхла дөрвн тоннас үлү аца зөөдг арһ уга.
Иим кемд автомобильн хаалһст ик аца зөөдг машид йовшго шишлнг темдгүд углж тәвгдх. ГИБДД-н көдләчнр болхла, чиннүр бүрткдг пунктд зака эвдсн жолачнриг илткж авх. Иим керг-үүлдврмүд күцәхд бас учр бәәнә. Ик аца зөөдг машид хаалһсиг агчмин зуур эвдрәх әәмшг бәәнә. Иим хаалһс шинрүлж ясхин төлә дала мөнгн кергтә болна. Үлгүрнь, нег дууна хаалһ шинрүлж ясхин төлә хөрн сай арслнг кергтә болжана. Специалистнрин келсәр, танһчин бюджетас эн жил йилһж өгх дөчн сай арслнг хаалһс шинрүлж яслһнд күршго. Нег үлү, хаалһс шинрүлж ясхла, нүк ьөглх кергтә, шишлнг темдг хаалһд зургдна, хаалһин хажуд бәәх темдгүд сольх кергтә.
Хальмгин хаалһин заллтин ах инженер Дмитрий Белоусовин келсәр, федеральн хаалһс йисн жилдән ясгдад уга. Эн жил бас эдн шинрүлж ясгдшго. Ода хамгин му бәәдлд Элст-Арзгир хоорндк хаалһ тусв. Давсн жилд эн хаалһар аца зөөдг машид тас йовсн уга, зуг гиигн машид йовх неквр орулгдла.
Онц келхд, әмт зөөж йовх, эм, түргн үрдг хот-хол болн машина тос-түлә авч йовх машид урдк кевәр йовж чаджана. Тер мет региональн чинртә хаалһар бачм чинртә йовдлмуд болн аюл учрсн цагт шишлнг техник бас йовж чадхмн.
Ээнән Ольга, Ирчин Алексей
