Цуг котельнас найн долан процентнь белдврин паспорт авв
Намрин-үвлин кемд белдлһнә көдлмшин ашин тускар танһчин жилишн-коммунальн эдл-ахун министерств тооца кев. Иим көдлмш күцәхин төлә ут-тоодан зун далн сай арслнг зуралгдж. Элст балһснд усна сурвлж шинрүлж яслһна төлә “Юг России” нертә программар федеральн хазнас хөрн зурһан сай арслнг ирв.
Эн өдрмүдт невчк серүн болад, Элст балһсна олн давхрта гермүдин эздүд дула өгхинь күләжәнә. Сүл цагт хур орад, серүтв, гермүдт киитрәд, батарей кезә дулан болх әмтн ухалжана. Хальмг танһчин ЖКХ-н министр Нелли Ткачеван келсәр, өдгәц агт цуг учрежденьс болн олн давхрта гермүдин ик зунь дула өглһнә кемд белн болв. ЖКХ-н министр Нелли Ткачеван келсәр, эндр өдрт цуг котельнас найн долан процентнь эс гиж зун тәвн негнь белдврин паспорт авв. Танһчин арвн муниципальн бүрдәц зун процентд белн болв.
Лаганя районд йирн зурһан процентнь белн. Хойр районд Ик-Буурла болн Көтчнрә райодт эн көдлмш невчк хашнгар кегджәнә. Ода нег минһн найн олн патьрта гермүд бәәнә. Белдврин паспорт бәәхлә, эдн үвлд белн болв гиж келж болх. Өдгәц агт цуг олн давхрта геромүдт иим паспорт бәәнә гиж залврин компаньс тооца кев.
Киитн ирхлә, танһчин зун тәвн котельнд ямаран чинртә белдвр кегдснь болн шин оборудовань яһж углж тәвгдснә тускар ил медгдхмн. Энергосервисин көдләчнрин келсәр, Элст балһснд ода хөрн нәәмн котельн көдлхдән белн болв. Зунын кемд энд дула өглһнә турвас, хәәсн, насосмуд болн утан һардг турвас капитальн кевәр ясгдв. Тер мет өдгә цагин некврлә ирлцәтә прибормуд углж тәвх арһ учрв. “Энергосервисин” ниицәнә слесарь Игорь Веденеевин келсәр, зунын кемд халун ус болн дула өгдг насосмуд ясгдв. Цуг халхар бүртклһн кегдв. Ода үвлин кемд көдлхдән белн болв.
Намрин-үвлин кемд белдсн цагт хамгин түрүнд бачм чинртә йовдлмудт кергтә түләнә, энергетическ көрнг элвгәр белдж авлһна кергтә мөнг белдж авлһна төр тәвгднә. Тогтсн кемжәһәр, белдж авсн көрнг һучн —дөчн тавн хонгт күрх зөвтә. Танһчин аварийн көрнгд тавн дундур сай арслнг йилһж өггдв. Тер мет үвлин кемд дчн немр электростанц, тер тоод машинд бәәх болн автономн электростанцс бас белдж авгдсн бәәнә. ЖКХ-н министр Нелли Ткачеван келсәр, Аварийн көрнг тогтаснас авн хойр жилин эргцд арвн негн дизель-генератор хулдж авч болв. Энүг муниципальн бүрдәцд өгв. Кемр бачм чинртә бәәдл тогтад, электрокүчн уга болхла, район болһн иим генератор көдлх. Энүг танһчин бюджетин мөнгәр хулдж авч.
Дәкәд болхла хотл балһснд аварийн бригадмуд тогтагдв, шишлнг техник көдлх. Дула өглһнә кемд эдн өдр-сө уга гилтә көдлхмн. Эн халхд дуту-дундс чигн бәәнә. Үлгүрнь, олзлсн газин өрн бәәнә. эндр өдрт Хальмг танһчин ЖКХ-н предприятьмуд газ олзлсна дөрвн зун сай арслнг өртә. ЖКХ-н министр Нелли Ткачеван цәәлһсәр, ода танһчин цуг райодт гилтә энергсервисин өр данцав. Темдглсн зураһар цуг өрн данцагдх. Хойр зун сай арслнг Энергосервисин мөнгәр өрн өггдх. Иим көдлмш сән ашта болх зөвтә. Үлдсн зун найн долан сай арслнг өриг “Ставропольрегионгаз” арвн зурһадгч жил күртл хооран саах зөвтә.
Бүклднь авад келхлә, өдгә цагт мана танһч дула өглюнә кемд күцц белн болв. Октябрин арвн тавнд Хальмг танһчин әмтнә гермүдт болн учрежедньд дулан экләд өггдхмн.
Гольдина Ирина, Очра Сергей
