Цасн орснас көлтә хааһлс хальтрата болв
Эндр өдрәс авн Элст-Волгоград хоорндк федеральн хаалһр машид йовлһн зогсагдв. Хам-хоша бәәх регионас циклон ирснәс көлтә Волгоградск областьд тенгрин бәәдл муурв. Салькна күчн чанһрад, цас орснас көлтә хаалһс мөстәд хальтрата болв. Иим тенгрин таалд Хальмгин межә һатц йовх керг уга, юнгад гихлә машид зуг Волгоградск областин межә күртл күрч чадх гиж ГИББД-н көдләчнр саглулжана. Цааранднь хаалһар йовж болшго. Тер мет Сарпинск, Баһ Дөврдә болн Октярбск райодын аһуд салькн чанһрад цасн орснас көлтә хаалһс хальтрата болх гиж госавтоинспекцин көдләчнр зәнглжәнә. Элст балһсна автовокзалас Элст-Саратов хоорнд йовдг автобус рейст һарсн уга. Тер мет тенгрин таалын му бәәдләс көлтә Волгоградын аэропорт хаагдв. Хаалһ зуг хойр зун тәвн метрт үзгднә, тегәд иим таалд самолетмуд нисж һардг арһ уга. Цуг авиарейсмуд арвн зурһан час күртл кегдшго. Кемр тенгрин бәәдл эс сольгдхла, аэропорт цаарандан чигн көдлшго.
