Бурятин режиссер эврәннь фильман үзүлв
“Булг хагсхла, жирһл уга. Эврәннь өвкнрән мартснд иргч уга”. Эн цецн үгмүд Бурятин режиссер Собон Лыгденовин фильмас авгдв. Элст балһснд энүнә түрүн көдлмш үзүлгдв. Шин кинофильмд цугнь бәәнә — ноолдан, бу-селмәс халһн талдан чигн хурц йовдлмуд үзүлгджәнә.
Булаг гисн үг бурят келнәс әрүн булг гиж орчулгдна. Кинофильмд үзүлгджәх цуг йовдлмуд энүнлә залһлдата. Бурятин бичкн селән үзүлгджәнә. Иим бичкн селән мана ик орн-нутгин булнг болһнд бәәнә. Көдлмш уга болад әмтн төрскн һазрасн талдан регионд одад мөнг олна. Талдан үлдсн улс болхла әрк-чаһрт авлгджана. Фильмд үзүлгджәх улсас зәрмнь бийән таньж чадх. Фильмин һол дүрнь дунд наста залу күн, селәнә интеллигент, урднь багшар көдлжәсмн. Ода әркд орад, нефрит һарһж авлһна зака эвдсн йовдлд орлцна. Өдр болһн гилтә әрк уужах Викторас энүнә авальнь үрдүдтәһән балһснд нүүж одна. Шин кинод һол дүриг журналист Владимир Ширапов нааджана. Кесг зовлнг дааж һарад, аштнь жирһлин чик хаалһд орад, әрк уудган хайна.
Фильм хәләсн улс цаарандан юн болхинь күләнә. Энүнд Әрәсән нертә артистнр Игорь Петренко болн Александр Голубев орлцжана. Эдн нааран ирс улсиг дүр үзүлжәнә. Хол һазрас әмтн блуг хәәһәд ирнә. Кикнофильмд цугнь бәәнә — ноолдан, бу-селмәс халһн болн талдан чигн хурц йовдлмуд учрна.
Келхд, эннь Солбон Лыгденовин режиссерин болн сценаристын түрүн көдлмш болжана. Иим эв-арһар цокж авсн Булаг фильмиг Бурятин түрүн үүдхвр гиж келнә. Хәләһәчнрин тоолврар, дәәлдәнә йовдлумдыг ик кезәнк цага бәәдлд режиссер Лыгденов үзүлжәнә. Сүл цагт Солбон Лыгденов әрәсәд цокж авсн олн кинофильм цокж авлһнд орлцв. Тер тоод “Питер ФМ”, “Мы — из будушего-2” ут-тоодан тәвн фильм. Тедн дунд һазадын ордудын кино бас бәәнә. Үлгүрнь, “Миссия невыполнима — 4”, “Президент Линкольн: Охотник на вампиров” нертә кинофильмс. Иим көдлмшөин йлвудт хоршасн дамшлт эврәннь үүдәвр цокж авхд сән нилчән күргв.
Режиссер Солбон Лыгденовин келсәр, хойр фестивальд диилвр бәрв. Якутск нарта-делкән фестиваляс гран-при авч ирж. Москван фестивальд бас сән күцәмж бәрж. Ода Европин болн Америкин фестивальмудт үрвр кев.
Шин фильм Бурятьд болн талдан чигн монһл яста улсин республикст үзүлгдсн билә. США-һас болн Канадас ирсн шалһачнр болн хәләһәчнр Булаг нертә фильмиг өөдәнәр үнлв.
Режиссер Солбон Лыгденовин келсәр, ода олн улс әрк-чаһрт авлгджана, селән түржәнә. Хажһр хүврлт болжана. Эннь һундлта. Энүг цуһар ил үзжәнә. Тогстн бәәдлиг матрхмн биш. Энүнә тускар ухалдг билә. Олн әмтн зовжана. Олна организац эн су зангла ноолдх зөвтә. Фильм хәләсн хөөн олн әмтн хуучн зургудан диглж авна.
Энүнлә хамдан церглсн Александр Текеев болн Сергей Власовин келсәр, шин кинод әркдлһнә төр һол орм эзлжәнә. Хальмгин хәләһәчнр бас эн фильмиг өөдәнәр үнлв. Ода деерән энүг олн улст үзүлсн уга. Болв шин фильм хәләсн улсин тоолврра, энүг олн әмтнә оньгт тусхах кергтә. Эн залу күүнә келсәр, шин фильмд олн-зүсн хурц төрмүд босхгджана. Унг-тохман гееһәд, әркд авлгдад, селәнд жирһл бөкжәнә. Һучн-дөчн наста залу чидлән әәхв гижәнә. Фильм хәләсн улс уха тунһах.
Эн күүкд күүнә тоолврар, иим төр кинод хаһлсн Солбонд ик ханлт өргжәнә. Иим төр өдгә цагт ик чинр зүүжәнә. Селән һазрт әмтн әрк ууһад хорджана.
Келхд, эн кино цокж авхин төлә Солбон Лыгденов Улан-Удэ балһснд эврәннь патьран хулдж. Тер бийнь режиссер һунджахш. Иргчдән талдан чигн үүдәврмүд цокж авх зурата. Түрүн диилврнь сүл болшго гиж нәәлжәнә. Ода Солбон Лыгденовд Москвад, Монакод болн Лос-Анджелес балһснд болх фестивальмудт орлцх үрвр кегдв.
Батан Санжирма, Бадмаран Владислав
