Бу-селмиг эврә дурар орулж өгх кергтә

Мана танһчд зака эвдж хадһлгджах бу-селм болн сум эврә дурар орулж өглһнә көдлмш күцәгджәнә. Энүг өгсн әмтн мөнг авхмн. Эн жиин май сард танһчин правительствин батлж авсн тогтаврар энүнә төлә зокал болн мөнгнә кемжән тогтагдв. Эн цагин эрцгд танһчин әмтн хөрн зурһан бу-селм эврә дурар орулж өгв.

Винтовк, анһучлһна бу, пневматик, травматическ бу-селм. Ода энүг хулдж авх саната улс дала. Өдгә цагт нурһлж бу-селм анһучнр хулдж авчана. Бу-селм хулддг магазина генеральн директор Виктор Бяткиевин келсәр, анһучлһна кем эклхлә, әмтн олар ирж бу-селм хулдж авна. Зәрм әмтн хуучн бу-селмин ормд шиниг хулдж авна. Эннь нурһлж мана танһчин анһучнр. Эдн дунд кесг жилдән анһучлжах улс бәәнә, шинкн эн эрдмд оржах әмтн чигн ирнә.

Бу-селм хулдж авлһн болн энүг хадһлһн нәрн болн жанһрта керг болжана. Энүнә төлә эмчин хәләврт экр биш орх кергтә, әәмшг уга бәәлһнә зокал медх кергтә, шишлнг зөвшәлин цаас һарһулж авх закан бәәнә. Полицин көдләчнр сар болһн бу-селм хулддг магазид эргж бүртклһ кенә, һурвн сард нег дәкж харлһна предприятьмудын көдлмш шинжлж хәләнә, жил болһн бу-селм темдглж бичсн улсиг бүрткж хәләнә.

Танһчин МВД-н цутхлнгин ахлач Евгений Шутовин келсәр, танһчин улсиг жилд нег дәкж бүрткж хәләх закан бәәнә. Эднә бәәсн һазрт участкин полицин көдләч бүрткж хәләнә. Тер мет иим бүртклһ инспектормуд бас күцәнә. Юридическ улиг болн магазидт иим бүртклһ мана цутхлнгин инспектормуд кех зөвтә.

Болв бу-селмиг йосн кевәр эс темдглж бичсн улс дала. Тегәд чигн иим улс эврә дурар олж авсн эс гиж эс темдглж бичгдсн бу-селмиг, сум болн хаһрдг эв-арһ орулж өглһнә туст ирлцнһү көдлмш кегджәнә. Ода иим әәмшгтә прдемте олж авхла дотр-дундын кергүдин органмудт орулж өгх кергтә. Иим улст мөнг өглһнә зокал болн кемжән батлж авгдсн бәәнә.

Евгений Шутовин келсәр, кемр эврәннь герин һаза әәмшгтә бу-селм, сум эс гиж хаһрдг эв-арһ олж авхла, тер дарунь полицин әнгд жиннүлх кергтә. Әәмшг уга бәәлһнә төлә олж авсн әәмшгтә предметиг малтж авх керг уга, ормаснь көндәхд әәмшгтә. Кемр әмтн эврә дурар бу-селм эс орулж өгхлә, эдн Әрәсән закаһар уголовн засгла харһулгдна.

Эврә дурар бу-селм орулж өгәд мөнг авлһн эн жилин май сарас авн эклв. Эн цагин эргцд танһчин әмтн хөрн зурһан бу-селм орулж өгв.

Елена Алексенко, Бадмаран Владислав