Бичкүдин һурвн сад көдлжәхш
Дошкольн учрежденьд оржах бичкдүдин эк-эцкнр “Вести-Калмыкия программин” редакцд жиннүлжәнә. Эн өдрмдүт эдн көдлмшән хаяд, бичкдүдтәһән гертән суух кергтә болжана гиж зәнглжәнә. Бичкдүдин садын герт хор цацлһна көдлмш күцәгджхәс иштә дошкольн учреждень цаг зуур хаагджана гиж эднд келж. Эк-эцкнрин келсәр, эннь худл зәнг болжана. Эднә тоолврар, дула өглһнә халхар боомтг болжана. Мана үүдәгч баг бичкдүдин садт ода эн төрәр цәәлһвр авв.
Эндр өдрт хотл балһсна һурвн дошкольн учрежденьд көвүд-күүкд оржахш. Мана үүдәгч баг арвн дөрвдгч садт одв. Эн дошкольн учреждень дөрвн өдртән көдлжәхш. Ах медсестра Надежда Потолохина келсәр, октябрин эклцәр бичкдүдин садт меряч бәәхнь илткгдв. Эдн подвальн хорад бәәх темс хадһлдг бәәрн орж. Садын герт шишлнг хулһна болн үкр хулһна үнр һарад бәәв. Зуг садын көдләчнр эврәннь нүдәрн хулһ болн үкр хулһ үзж уга.
Ах медсестра Надежда Потолохина келсәр, бичкдүдин садт ода хорлһна көдлмш кегджәнә. Йисн хонгтан көдлшго. Октябюрин арвн тавнд дошкольну чреждень дәкнәс көдлх. Цеврлһнә көдлмш кегдснә хөөн бичкдүдиг орулж авх. Бичкдүдин садын өөр эзнә гермүд бәәснәс иштә нааран хулһн болн үкр хулһн орж ирв.
Ода негдгч давхрт, көгжмин залд, медицинск кабинет болн наадһлһан хорад хорн тәвгдв. Дошкольн учреждень хулһн болн үкр хулһн гүүж ордг йовдл урднь чигн учрдг билә. Элст балһсна эрджм-сурһулин заллтин әнгин ахлач Наталья Бютцинован келсәр, эн төр эднә чанһ бүртклһнд бәәнә.
Заллтин әнгин ахлач Наталья Бютцинован келсәр, ода хулһн дулан һазр хәәһәд канализационн турваһар гүүж иржәнә. Тегәд чигн хулһн болн үкр хулһн дошкольн учрежденьд орна. Намрин кемд иим хортн ирхлә, бичкдүдин садмуд хаагдна. Зунын кемд ясврин көдлмшлә зерг хорлһна көдлмш кегднә. Иим көдлмш нег долан хонгтан күцәгднә.
Бютцинован келсәр, хулһн эс гиж үкр хулһн бичкдүдиг зуусн нег чигн йовдл учрсн уга, тер мет көвүд-күүкд хордсн уга. Иим хорт хорлһна төлә хотл балһсна бюджетд мөнгн йилһж өггднә. Ода эк-эцкнрин сурврар дөчн бичкдүд талдан дошкольн учрежденьд оржана. Эн тоод көдлмшән хайж чадшго эк-эцкнрин көвүд-күүкд орв. Хойр хонг болад бичкдүд дәкнәс эврәнь садтан орж чадх.
Ээнән Ольга, Эрнжәнә Эрднь
