Бичкн артистнр фестивальд сән үзмж бәрв
“Весенний перезвон” нертә һурвдгч нарта-делкән фестиваль Саратов балһснд болв. Хальмг таңһчин нериг “Байр” нертә Элст балһсна бичкдүдин искусствин хойрдгч тойгта школын сурһульчнр харсв. Эдн “Инструментальная музыка” нертә номинацд диилвр бәрв.
Элст балһсна хойрдгч тойгта бичкдүдин искусствин школын Байр нертә ансамбль жюрин оньгт хойр көгжмин үүдәвр тусхав. Эннь Туяна болн хальмг дудын попурри. Бичкн көгжмчнр домбр цокв, хуучяр, ятхар болн талдан чигн зевсгүдәр татв. Инструментальн көгжм нертә номинацд арвн коллектив орлцв. Хальмгин бичкн артистнр аштнь негдгч девснгин лауреатын нер зүүв. Эн күүкнә келсәр, Саратов балсһнла өөрхн таньлдх саам учрв. Бумбс болн талдан чигн туужлгч орм хәләж. Бидн цуг артистнр хальмг улсин хувц өмсж. Эннь бас сән нилчән күргв гиж эн келнә. Эн көвүнә келсәр, олн-зүсн соньн зевсгәр наадна. Көгжм йир таасгджана. Эн күүкнә келсәр, хуучир зевсг таасгдна. Энүнә көгжм йир ке-сәәхн болна.
Хальмгин зевсгүдин әнгин сурһульч Эльзят Анкаева хойрдгч орм эзлв. Эн күүкн Аркадий Манджиевин үүдәсн дәәчнрин би болн "Шог би" жюрин оньгт тусхав. Арвн негн наста күүкн цугәрәсән марһанд хамгин түрүн болж орлцжана. Эльзят көгжмин эрдмәр зурһан жилдән сурчана. Хойрдгч школын сурһульч Эльзят Анкаеван келсәр, иим ик чинртә марһанд түрүн болж орлцжана. Тегәд невчк үүмж. Ирчг дөрлдәнд эрк биш диилвр бәрх саната.
Фестивалин орлцачнр дунд Әрәсән олн регионмудын болн Казахстана бичкдүдин үүдәгч коллективмуд болн йисн наснас авн арвн тавн нас күртл онц көгжмчнр дөрлдв. Жюри дөрвн номинацар артистнриг үнлв. Эннь хореографь, инструментальн көгжм, вокал болн хорин дуулһн. Школын багш Цаһан Музраеван келсәр, бичкн көгжмчнр олн улсиг хальмг улсин сойлла таньлдулж чадв. Онц келхд, школын бичкн көгжмчнр хотл балһсна, танһчин болн нарта-делкән марһаст диилвр бәрсн билә.
Хойрдгч искусствин школын хальмг улсин зевсгүдин әнгин багш Цаһан Музраеван келсәр, марһанд ик эртәснь тохнята белдвр кегдв. Зәрмдән амрлһна өдрмүдт чигн көдлх кергтә болв. Тавн-зурһан частан көдлдг бәәж.
Ода искусствин школын сурһульчнр эн жилин июнь сард Испаньд болх нарта-делкән фестивальд белдвр кежәнә.
Ээнән Делгр, Котина Валерий
