Бичкдүдин диспансерин гер шинрүлгдж ясгдв
Кесг цагтан ясвр кегдсн хөөн танһчин садв гемтә улсин диспансерин бичкдүдин әнг шинәс көдлжәнә. Энүнд капитальн ясвр кегдв. Иим ясврин көдлмш эрүл-менд харлһна халх шинрүлһнә программар кегдв. Һучн тавчгч жилд тосхсн герт иим капитальн ясвр түрүн болж кегджәнә.
Бидн мебель хулдж авлавидн. Иим төмр шкаф эм хадһлхин төлә хулдж авгдла.
Эн өдрмүдт садв гемтә улсин диспансерин бичкдүдин әнг байрлад, шин бүүрт нүүж орхар белджәнә. Эрүл-менд нертә келн-улсин программар шинрүлж ясгдсн хораст шин мебель углж тәвгдх. Энүг экләд авч иржәнә. У-сарул хорас болн кабинетмудт ода күртл ширин үнр һарда уга, энүнд шин дула өглһнә систем углж тәвгдв, терз-үүдн сольгдв. Хойр жилдән болсн ясврин көдлмшин хөөн энүнд бичкдүд бийән эмнүлж чадх. Иим ясвр эрүл-менд харлһна халх шинрүлһнә государственн программд эмнүлин учреждень орснас иштә кегдв. Һучн тавдгч жилд тосхсн герт нег чигн капитальн ясвр кегдсн уга билә, герин ора хуучрад әәмшг учражала. Дула өглһнә систем бас хуучрад эвдрв.
Танһчин садв гемтә улсин диспансерин ах эмчин дарук Валентина Бадмаеван келсәр, проектн-сметн документацар ясврин көдлмшт һучн йисн сай арслнг йилһж өггдв. Энүн деер немр ясврин көдлмш бас кегдв, тер толд герин һазадк эрсн шинрүлгдв, амбулаторь ясгдх, шин мебель хулдж авгдв.Ода ясврин көдлмш найн процентд күцәгдв.
Бичкдүдин диспансерт ода зуг амбулаторин гер шинрүлж ясгдад уга. Ода энүнд тосхачнр ясврин көдлмш күцәжәнә. Диспансерин герт тәвн күн бийән эмнүлж чадх. Ода стационарн эмнүлһнд һучн хойр бичкдүд бәәнә. Эдн нилх наснас авн арвн долан анас күртл көвүд-күүкд. Спортивн залд тренажерн оборудовань бәәнә, наадһлһна хора шинрүлж ясгдв, хот уудг хора бас тас талдан бәәдл һарв. Ода сурһулин классмудын хорасиг шинрүлх кергтә. Энд нәәмн багш көдлжәнә. Эдн бүкл жилдән бичкдүдиг гиигн школьн программар дасжана. Зәрм бичкдүд энд кесг жилдән бийән эмнүлнә. Тегәд чигн диспансерин һардачнр бичкдүдин төлә библиотек секв.
Арһ-чидләрн библиотекин санг теткгджәнә. Библиотек бичкн. Энүнд спонсормуд дегтр авч ирж өгнә гиж Бадмаева келнә.
Удл уга диспансерин физиоэмнүлһнә әнгин хуучн оборудованя ормд шин оборудовань углж тәвгдх. Тер мет рентгенкабинетд, баклабораторьт, шишлнг эмчнрин хораст бас шин оборудовань болн прибормуд ирхмн. Ут-тоодан эрүл-менд нертә келн-улсин программар һучн һурвн сай арслнг йилһж өггдх. “Госгарантия” программар эмнүлин учреждень немр шин шишлнг оборудовань хулдж авх зөвтә. Энүг садв гемтә улсин бичкдүдин әнгин көдләчнр ик кезәнәс авн күләжәнә. Жил ирвәс садв егмтә улсин то мана танһчд өсәд йовна.
Эмчин келсәр, сарнг-мигмр болн баснг өдр болһн бичкдүд шинжлтд орна. Өдртән һучн-дөчн көвүд-күүкд эмчин хәләврт орна.
Зәрмдән фтизиатр эмч нег өдртән зун бичкдүдиг шинжлж хәләнә. Ода эдн шинрүлгдсн шин герт ирәд, цуг кергтә эмчин шинжлтд орж чаджана. Диспансерин һаза эмчнр Улан Удэ балһснас авч ирсн бурятин кедрин мод суулһв. Эрүл-менд нертә программар күцәгджәх цуш шинрлт әәмшгтә гемиг диилхд сән нилчән күргхинь эмчнр нәәлжәнә.
Хавтхна Элла, Эрнжәнә Эрднь
