Бичкдүдин театральн коллективмудын марһан болв
Әрәсән келн-улсин туульс нертә бичкдүдин театральн коллективмудын марһан танһчин бичкдүдин үүдәлтин цутхлнгд болв. Энүнд хотл балһсна болн райодын зун сурһульч орлцв.
Һазадын ордудын, тер тоод Китдин, Монһлын, Нигерин, Камеруна элчнр орлцата иим ик чинртә керг-үүлдвр баһчудт теслтин сурһмж өглһнд ик оньг өггджәх ил герч болжана. Тегәд чигн хол һазрас ирсн гиичнр келсн үгдән негдлт, иньглт болн нөкцлт гидг үгмүдиг икәр олзлад бәәв. Бенин орн-нутгин элчин келсәр, Хальмгт хойрдад иржәнә. Иим чинртә керг-үүлдвр баһчудт сән урмд өгх. Энд оютнр сурхд цуг таал бәәнә.
“Мы такие разные, но мы вместе”. Иим товч үгмүд Әрәсән Өмн үзгин болн нарта-делкән талдан чигн орн-нутгудын оютнр сцен деер һарч ирхлә ил кевәр герчлгдв. Эдн цугтан олн-үзсн келәр келнә, тер бийнь баһчуд нег-негән сәәнәр медв. Юнгад гихлә, иньглтин болн ни-негн бәәлһнә келн олнд сәәнәр медгднә. Иим күцлтәһәр гиичнр түрүн болж Хальмг танһчин хотл балһснд цуглрв. Монһлын оютын келсәр, энд гертән бәәснлә әдл болж медгднә. Мана сойл, келн өөрхн. Ростовд сурчах Нигерин элчин келсәр, энүнлә хамдан хальмг күүкн сурчана. Тегәд чигн хальмг танһчла өөрхн таньлдха санан орв. Ода энүнә санан күцв, энд ирәд хальмг танһчла өөрхн таньлдв.
Хальмг танһчин толһач Алексей Орлов фестивалин орлцачнриг йөрәхләрн, олн келн-улсиг негдүлжәх оютнрин ах-дү болгч зангшал сойлын болн талдан чигн халхин бат ул болжана. Алексей Орловин келсәр, Хальмг танһч гиичнрт байрлна. Ахр болзгт энд бәәв чигн, тадн мана улсин бүлән болн цаһан седкл авч хәрхит. Баһчудын иим фестиваль олн келн-улсиг негдүлжәнә. Эннь йир олз-туста керг болжана.
Өдгә цагт Хальмгин университетд һазадын ордудас зу һар оютнр сурчана. Эднә ик зунь орс кел сәәнәр дасж авсан үзүлв. Һазадын ордудын оютнр орсин алдр шүлгч Александр Пушкина шүлгүд умшв, олнд таасгдсн ду дуулв, би биилв. Фестиваль бүрдәх седвәр татсн Хальмгин университетин ректор Бадм Салаевин тоолврар, талдан келн-улсин сойлла таньлдхларн, бидн нег негән сәәнәр медж авнавидн.
Гиичнрин тоолврар, хамгин ке-сәәхн нәр-наадн хальмгин хотнд болв. Аршан селәнә өөр ке-сәхн ишкә гермүд ик холас дүнгәж үзгднә. Энүнд хальмг улсин кезәнк авяьс-зангшалла өөрхн таньлдж болв. Һазадын ордудын оютнр хальмг улсин хот-хол — өвәрц күр мах-шөл, боорцг болн зандн хальмг цәәһәр тоогдв. Домбрин айс соснчкад, эдн лор ормдан зогсж чадлго, биллв. Чехин оютын келсәр, хальмг улсин хот-хол таасгдв. Боорцг, цә, махн-шөлн йир амтта хот болж медгдв.
Эндр фестивальд орлцачнриг ик программ күләжәнә. Эдн Элст балһснла өөрхн таньлдхин төлә экскурсь кех, олн-зүсн спортивн марһаст орлцх.
Ээнән Ольга, Настан Сергей, Хавтхна Анатолий
