Бичкдүдин садын көвүд-күүкд унг-тохман сәәнәр меднә

Эврәннь уңг-тохмин туск медрлән хөрн хойрдгч тойгта хотл Элст балһсна бичкдүдин садын көвүд үзүлв. эдн эврәннь эк-эцктәһән хальмг келәр өрк-бүлин туск презентац белдв.

Зурһан наста Эрнцн Санджиев эврәннь унг-тохман долан үй күртл сәәнәр меднә. Эврәннь аав-ээжиннь болн өвкнриннь тускар бахмжтаһар келж өгнә. Эн көвүн марһанд эврәннь эгч Алтанатаһан ирв. Энүнд орлцхин төлә белдвр цуг өрк-бүләрн кеж. Эрнцн Санджиевин келсәр, “Ээжин келн” нертә марһанд белдхләрн унг-тохмин тускар келж өгләв. Хойрдгч орм эзлв. Марһанд белдвр кежәһәд, гемнж. Тер бийнь марһанд ирв. Гертән эк-эцктәһән, аавтаһан хальмгар күүнднә.

Онц келхд, бичкдүдин садт иим керг-үүлдвр дару-дарунь бүрдәгднә. Тегәд чигн бичкн көвүд-күүкд төрскн келән, уул сойлан сәәнәр меддг болв. Марһанд орлцсн цуг көвүд-күүкд келн-улсин багд оржана.

Иим марһан болхин тускар Дорж-Һәрәевихан өрк-бүл эврәннь көвүн Эрднәһәс медв. Эднә эк Алевтина Бадмаевнан келсәр, дөрлдәнд орлцх седврә Эрднь татсмн. Энүг ээжнь дөннв. Өрк-бүлин унг-тохмиг ээжнь келж өгч.

Марһана завсрт талдан бичкн көвүд-күүкд ду дулад би биилв.

Адьяновихна, Санджиевихна болн Дорж-Һәрәевихна өрк-бүлмүд марһан йир тохнята белдвр кеж. Өрк-бүлмүдин архивас материал цуглулв, көгшдүдәс цәәлһвр авч, хальмг улсин амн үгин зөөр дасв. Аштнь иньглт диилв. Марһанд орлцсн цуг көвүд-күүкдт хальмг туульс болн төрскн келнә дегтр белглв. хальмг келнә багш Клавдия Серятирован келсәр, иим белгүд бичкдүдт олз-туста болсн деерән эк-эцкнрт бас кергтә болх.

Шаран Баира, Очра Сергей