Бату Хасиков дарани диилвр бәрв
Бату Хасиковин диилвр нарта-делкәд ик чинртә йовдл болв. Хөрн долан наста Голландин нертә спортсмениг шүүһәд, кикбоксингин нарта-делкән чемпиона нериг харсв. Москва балһсна “Сокольники” нертә спортын комплексас “Россия 2” телеканал кесн үзүлвриг Әрәсән болн һазадын орн-нутгудын кесг сай күн хәләв. Бату Хасиковиг дөннжәх улсин седвәрәр цуг Әрәсәд кесг фан-бәәрн бүрдәгдв. Хальмг танһчд иим хойр һазр Элст балһснд болн Лаганьд тогтагдв. Энд олн улс цуглрад, икәр үүмж Хасиковиг дөннв. Спортын комплекст нәәмн минһн күн цуглрв. Бату Хаисков эврәннь дурта Ээжин ду дахад һарв. Ноолдна эклцәс авн хальмгин боксер түргн кеәвр дәврәд, эрк биш диилвр бәрхән медүлв. Хамртан шав авсн бийнь, Бату зүткәтәһәр ноолдад, агчмин зуур түрүн раундт Голландин элчиг диилв.
