Баһ Дөрвд селәнә хойр уульнцд усн ирх

Баһ Дөрвд селәнә хойр хуучн уульнцин бәәрн улс уудг усар теткгдх. Эн байрта йовдлыг эдн дөчн жилдән күләв. Бәәрн улсин бичсн бичгүд, танһчин һардачнрт орулж өгсн эрлһн ода ирж ханһагдв. Хойр уульнцд усна сурвлж татхин төлә танһчин бюджетас мөнгн йилһж өггдв. Энүнд кергтә цуг оборудовань хулдж авгдв. Удл уга сурвлж татлһна көдлмш энд эклх.

Энүнәс Баһ Дөрвд селән эклсмн. Николаевин болн Комаровин нертә уульнцс селәнд хамгин хуучн. Эдн дөчн жил хооран тогтсмн. Болв ода күртл эн хойр уульнц цутхлнг усна сурвлжнла залһлдата уга бәәж. Бовжн Манджиев Николаевин уульнцд бәәршлжәнә. Баһ Дөрвд селәнә талдан услла хамдан бәәцин таал олзлна. Усна бассейнд турва тәвж, бичкн моторчик көдлжәнә. Иим амр эв-арһар гертән ус бассейнас авчана. Болв сад-һарудыг һарарн ус зөөһәд услх кергтә болна.

Иим бәәцин таал талдан чигн тавн өрк-бүл олзлжана. Талдан тәвн өрк-бүл хуччн кевәр худгас болн бассейнас ус авчана. Зөөврин усн үнтә болна гиж эдн келнә. Нег бочк усн дөрвн зун арслнг күрчәнә. Эннь дегд үнтә болн жанһрта төр болжана. Тавн жилдән эн уульнцин бәәрн әмтн эднә уульнцд усна сурлвж татхин тускар олн-зүсн һардачнр одад, зовлнган медүлсн билә, бичгүд бичв, танһчин толһачд бас келн билә.

Ода эднә төр хаһлгдв. Усна сурвлж татхин төлә танһчин бюджетас тавн зун минһн арслнг йилһж өггдв. Эн мөнгәр цуг кергтә оборудовань хулдж авгдв. Цөн өдр болад нааран һазр малттдг техник ирәвд, нег минһн метрт усна сурвлж татх нүк малтхмн.

Цутхлнг магистраляс эврәннь гер талан турвасиг өрк-бүл болһн эврән тәвх зөвтә.

Николаевин болн Комаровин нертә уульнцд ик кезәхнәс авн күләжәсн усна сурвлжн эн жилин намрар тосхгдх зөвтә. Бәәрн әмтн энүг тенкән уга гидәгәр күләж, ус орулж авхар белдвр кежәнә.

Елена Алексенко, Хавтхна Анатолий