Автошколмудт сурһуль дасхлһна шин зокал орулгджана
Эн жилин февралин нег шинәс авн автошколмудт сурһуль дасхлһна шин зокал орулгджана. Иим сольвр маши залдг зөв авхин төлә жолачнриг белдлһнә шин зокалла ирлцәтәһәр орулгдв. Дәкәд нег тодлад келхлә, көлгн-күч залх зөв өглһнә Әрәсән правительствин тогтаврин тускар өргн күүндвр кегджәнә. Ода тогтаврин төсв ирлцнһү ведомствд зөвшәлгдв.
Әрәсәд орулгджах шин закаһар мопед залхин төлә зөвин цаас эрк биш авх кергтә болжана. Иим зөв баһчуд арвн зурһан настаһасн авн авч чадх. Тер мет ода шин закаһар автошколд сурлго ГАИ-д жолачнр шүүвр өгдг арһ уга болх. Шин зокалар гиигн авмашина жолачнр автоматическ эв-арһта автомобильмуд залдг зөзвиг авхин төлә дамшлтын шүүвр өгх зөвтә. Ода автошколд жолачнриг белдлһнә "В" категорин сурһуль күнд болх.
ГИБДД-н әнгин ахлач Виталий Хаминовин келсәр, хаалһар йовлһна зокалын шүүвр болна. Энүг сурһуль дассн улсас найн — йирн зурһан процентнь өгнә. Жолачнрт ода хамгин күнд шүүврнь — шишлнг плошадкт, балһсна хаалһст маши залдг дамшлтын шүүвр болжана. Иим шүүвриг тәвн процентнь өгнә. Сурһуль бүрдәлһнә көдлмшәр кесн шинжлтын хөөн, жолачнриг дасхлһна чинр өөдлүлһнә тускар селвгүд орулж өггдв.
Гиигн автомобильмудын жолачнриг белдлһнә программ кемжәһәрн икдх. Автошколмудт жолачнриг белдлһнә цагин болзг икдх, ода автошколд хойр сарин ормд жолачнр һурвн сардан сурх. Теоретическ кичәлмүдин то невчк баһрх. Болв маши залдг дамшлтын болзг өсх.
Хальмгин ГИБДД-н государственн инспектор Сергей Гончаровин келсәр, шүүвр өгдг тавн сурвр хәләхлә, ямаран чигн клавиш дарж болх. Тавн сурврас нег сурвр шүүж авх кергтә. Нег дәкж клавиш даохал, сурвр ик үзгәр һарч ирнә. Энүнд хәрү өгх кергтә болжана.
Шин зокалар автошколд цуг кергтә оборудовань бәәхлә, тер тоод компьютерн автодром бәәхлә, дамшлтын шүүвриг ГИБДД-н көдләчнр угаһар авч болх. Кемр автошколд цуг кергтә оборудовань уга болхла, маши залдг зөв авхин төлә шүүвриг Госавтоинспекцин органмудт өгч болх. Маши залдг теорин болн маши залдг дамшлтын шүүврәс нань жолачнр түрүн медицинск дөн күрглһнә дамшлт хоршах, хаалһст цүүгәг угаһар йовлһна улын медрл авхмн.
Автомобилистнрин ниицәнә цугәрәсән Хальмг танһчин организацин ахлачин дарук Ольга Габунован келсәр, сурһулин хойр блок оурлгджана. Универсальн болн базов блок. Сүл блокнь — хаалһар йовлһан зака медх, маши әәмшг угаһар заллһна, түрүн медицинск дөн күрглһнә дамшлтар сурһуль кегдх. Хойрдгч әнгнь — профильн әнг. Энүнд машина техническ халх медх кергтә, көлгн-күч олзлһна, маши залдг дамшлтар сурһуль кегдх.
Автомобилистнриг дасхлһна халхиг ик кезәнәс авн шинрүлж хүврүлх кергтә бәәсмн. Эннь цагин неквр болжана. Жил ирвәс хаалһст зеткртә йовдлмудын то өсәд йовна. Хойр минһн арв һурвдгч жилд хаалһс учрсн зеткртә йовдлмуд нурһлж шинкн маши залжах жолачнр орлцата учрв. Тегәд иим бәәдл ясрулхин төлә шин закан үүлдврт орулгджана.
Бевина Мергн, Котина Валерий
