Андрей Джимбиев найн нәәмн нас зүүв

Амр Санана нертә дегтрин сангд Жимбин Андрейин бичсн «Көгшә болн нарта орчлнг» гидг поэм орчуллһна марһана аш диглгдв. Марһан хальмг кел делгрүллнә олна ниицәнә болн дегтрин сангин көдләчнрин хамцу проект болсмн.

Эн ончта керг-үүлдвр байрта йовдлар эклв. Дигтә өцкүлдүр Андрей Манганыкович найн нәәмн нас зүүв. Тегәд Амр Санана нертә дегртин сангд хурсн улс, тер тоод танһчин правительствин, министерствсин һардачнр, йирин чигн эгл улс Андрей Манганыковичин күнд болвчн соньн жирһлин хаалһин тускар келәд, йөрәлин үгмүдән тусхав.

Үг келсн күн болһн бичәчин үүдәлт дорас өсч йовх баһчудт патриотическ сурһмж өгдгинь темдгләд, Андрей манганыкович бийнь чигн эврә бәәдл-жирһләрн олнд үлгүр болж йовхинь зааһад, цаарандк хаалһднь күцәмж дурдв.

Эн харһлтын һолгч кергин негнь «Көгшә болн нарта орчлнг» гидг поэм орчуллһна марһана аш дигллһн бәәсмн. Марһанд хөрн негн күн орлцсмн. Бөдүн улсла зергдән школын сурһульчнр чигн чидлән сөрж чадцхав. Зөвәр гүн учр-утхта поэмиг Әрәсән ачта артист Иван Уланов умшад олна оньгт тусхав.

Дарунь марһана аш диглгдв. Келхд, жюрин ханьд орсн улс марһанд орлцсн күн болһиг тойгудар темдглж бичсмн. Тегәд марһана йовудт кен диилвр бәрхнь сүл күртл медгдл уга бәәсмн. Дәкәд болхла, мана хальмгин бәәрн әмтнәснань марһанд Москва, Санкт-Петербург балһсдын әмтн орлцх санаһан медүлж эврә көдлмшән жюрин хайгар илгәсмн. Марһана ашар журналист Арслан Санджиев диилвр бәрәд, арвн минһн арслнг мөнгнә мөрәһәр ачлгдв.

Энүнәс нань шүлгч Алексей Скакуновин, Владислав Багликовин, Василий Чонгоновин көдлмш темдглгдв. Марһанд орлцсн цуг хөрн негн күүнд Андрей Манганыковичин бичсн дегрт белглгдв. Дәкәд болхла, цуг орчулачнрин көдлмш салу дегтрәр барлгдхмн.

Иим керг-үүлдврмүдиг олна совет цааранднь чигн бүрдәж даулхар зураплжана. Хальмг кел делгрүллһнә халхд эннь эрк биш ниилчән күргхнь лавта.

Нәдвдә Тамара, Колдан Церн