“Алтн Булг” нерәдллһтә Танһчин бичкдүдин марһан эклв

“Алтн Булг” нерәдллһтә Танһчин бичкдүдин марһан эврәннь көдлмшән Яшалтан районд эклв. Эн марһанд района йисн школын күүкд көвүд орлцв. Бичкдүдин марһан Хальмг Танһчин эрдм сурһулин, сойлын болн номин министерствар, болн мана телеүзлврин нилчәр бүрдәгджәнә. Марһана түрүн девснг Таһчин райодмудар болх, эврәннь билг эрдмән йилһән сәәнәр үзүлсн көвүд күүкд хойрдг девснг орх.

«Алтн Булг” нерәдллһтә Танһчин бичкдүдин марһан эврәннь көдлмшән Яшалтан района Баһ Тугтн школд эклв. Марһан эклхин өмн эврәннь йөрәлин үгән эн школын һардач Сабрукова Татьяна келәд дөрлдәнд орлцжах цуг көвүд күүкд цаһан хаалһ дурдв. “Алтн булг” нерәдллһтә марһанд йисн команд орлцв.

Көвүд-күүкд эврәннь командын тускар девиз келәд, ду дуулад байр үүдәв.

Команд болһн хоорндан хальмг келән, авьяс —заншалан, йөрәлмүдән, үлгүрмүдән болн тәәлвртә туульсан сәәнәр меддгән жүрин гешүдт болн ирсн эк эцкнрт үзүлв.

Яшалтан районд хальмг келиг хальмг көвүд күүкдлә әдл талын келн улс дасцхана.Эднә келсн йөрәльн, дуулсн дуд олн әмтнд таасгдв.

Эндр өдр иим марһан кергтә, юнгад гихлә дорас өсч йовх баһчуд хальмг келиг сәәнәр медхш.Марһанд орлцсн бичкдүдт эн керг үүлдвр таасгдв.

Команд болһн эврәннь билг эрдмән сәәнәр үзлв, жүрин гүшүдт эдниг йилһх йир күнд болв. Эмблем харслһна марһанд Эсто Алтайн дундын школын Көглтин Даван ачнр гидг команд нүүрт һарв. Үлгүрмүд сәәнәр меддг көвүд-күүкд Баһ Тугтна школд сурчана. Йөрәлин марһанд Краснопольск школын команд сән үзмжтәһәр орлцв. Дууна марһанд Яшалтан школ йилһрв. Жүрин гешүд марһанд орлцсн көвүдт күүкд ханлтан өргж йөрәлин үгән келв.

Цааранднь иим марһан Танһчин райодт давулсна хөөн зональн марһан болх.