Алексей Орлов Әрәсән правительствин сүүрт орлцв
Энүнә тускар Әрәсән правительствин сүүрт бас тодрхаһар келгдв. Танһчин толһач Алексей Орлов мана орн-нутгин селәнә эдл-ахун чинртә һазрин мелиорацин делгрлтин федеральн шишлнг программин төсвәр ухан-тоолврарн хувалцв. Алексей Орловин келсәр, Хальмгин экономикин һол халхнь селәнә эдл-ахун халх, энүнә улнь мал өсклһн. Ода эн халхин һол төрнь — бордлһна плошадкд мал өскәд, эднә то икдулх кергтә. Хальмг танһчд эн төр танһчин шишлнг программар күцәгджәнә. Эндр өдрт услврин һазрин аһу найн минһн гектарт күрв. Шин программар мана регионд услврин систем тосхлһна көдлмш кегдх. Эннь мана танһчд ик чинртә төр, хамгин түрүнд Элст балһсна улсиг уудг усар тетклһн хурц төр гиж региона толһач темдглв. Тер мет шин программар иргч һурвн-дөрвн жилин эргцд услврин систем ясрулһна ашт олна малд хот элвгәр белдж авч болх. Иим төсвәр немр мөнгн йилһж өггдх. Эн программиг дөннх селвг Алексей Орлов орулж өгв. Энүг күцәхлә хот-хоолын әәмшг уга бәәдл тогтх, сән чинртә махна зүүтә продукц кеж болх. Сән чинртә махн мана танһчд йоста бахмж болжана.
