Алексей Орлов баһчудла харһад күүндв
Хальмгин университет йилһән сәәнәр төгсәсн баһчуд эндр танһчин толһач Алексей Орловла тодрха күүндвр кев. Деед сурһуль йилһән сәәнәр улан дипломар төгсәсн болн университетин олан бәәдл-жирһлд шунмһаһар орлцсн баһчудт көдлмш өгх седвәр мана региона толһач татсн билә. Энүнә төлә оют болһн тавн жилдән эврәннь күцәмжин тускар зәнг цуглулв. Тәвнәс олн балл авсн оютнр күцәмжин иткүлин цаас авна. Иим баһчуд зуг тавн эс гиж дөрвн темдгәр сурх зөвтә. Эн жил иим хөрн тавн күн эврәннь сурһулин кемжәһән иткүлв. Иим көвдү-күүкд көдлмшт орж чадв. Алексей Орловин тоолврар, деед сурһульд гүн медрл авсн баһчуд төрскн танһчиннь делгрлтин төлә көдлх зөвтә. Энүнә төлә танһчин болн Хальмгин государственн университетин һардвр цуг кергтә таал бүрдәжәнә. хальмгин оютнр нарта-делкән чинртә марһаст болн фестивальмудт орлцна. Тер мет мана танһчин баһчуд Китдин орн-нутгт, Монһлд болн Германьд дамшлтан өөдлүлжәнә.
