Алдр Торһн замар экспедиц цаарандан кегджәнә

Эндр “Алдр Торһн Зам” нертә экспедицин орлцачнр Яшкульск района Улан Эрг поселкд ирх. Эдн Үстин района Бергн поселкас экләд һарч йовсмн. Энүнә хөөн зуульчнр Приютненск районд темцх. Тенд эдн бамб цецгүдин фестивалин байрт орлцх.

Экспедицин орлцачнрин келсәр, маршрутар йовхд тенгрин бәәдл сән таал өгв. Түрүн авгтан догшн салькн көдләд, хур орад, эднд ик боомтг болад бәәв. Ода караван Молодежный, Утта, Яшкуль селәд давж һарв. Эн өдрмүдт энүнә орлцачнр Яшкульск района Улан-Эрг поселкд өөрдж йовна. Эн селән Элстәс дөнч тавн дуунад бәәнә. Дөрвн өдрин эргцд зун далн дуунад йовв. Экспедицд номтнр, фермермүд болн оютнр орлцжана. Эдн Алдр Торһн Замин хаалһар йовж йовна. Төсвин һардач Юрий Сангаджиевин келсәр, кезәнк караванн хаалһ Маныч нуурт күрәд, цааранднь салад һарч одснь космическ зургт сәәнәр үзгднә. Тегәд эндрк экспедицин һол күцлнь — нүүдлин авьясар бәәсн улсин тууж сергәж, Хальмг танһчин аһуд шин соньн һазр илткж авад, иргч туристическ маршрут темдглж авлһн болжана.

Юрий Сангаджиевин келсәр, Хальмг танһчин төлә Алдр Торһн Замин хаалһиг темдглж авх санан бәәнә. Тегәд Алдр Торһн Замар йовх шиидвр авгдв. Хаалһдан шишлнг темдгүд тәвжәнә. Танһчин күн болһн Алдр Торһн Зам ямаран хаалһар йовсинь медх зөвтә. Утта Әрәсәд хамгин халун һазр. Хойр минһн арвдгч жилд энд дөчн тавн градус халун болв.

Экспедицин орлцачнр өрүн долан часла босад, нәәмн часла хаалһдан һарч йовна. Хальмгин университетин оютн Бадм Дохаевин келсәр, иим көдлмшт дарунь ижлдв. Энүнә эцкнь темә өскдг билә гиж эн келнә. Келхд, эцкнь экспедицин ханьд бас орв. Эдн йовжах хаалһ энүнд өөрхнь болн сәәнәр медгднә.

Бадм Дохаевин келсәр, бичкнәсн авн иим көдлмшт ижлдв. Тегәд ик күнд болжахш. Темәдиг яһж асрж хәләхин тускар меднә. Эдниг яһж сурхдгинь эцкәсн авн медж авла. бичкндән эцкдән нөкд болдг бәәж.

Экспедицин орлцач Игорь Нарановд темәһәр у-өргн теегәр йовхд йир соньн болжана. Темән деер сууһад йовхла, күүнә өмн ке-сәәхн у-өргн тег энг-зах уга. Хаврин тег өдр ирвәс сәәхрд, үвлин нөөрәс сержәнә. Игорин келсәр, чееж сергмж авад, бийән сул үлмә уга күн гиж тоолжана. Өвкнрин нүүдлин зангшалар бәәхд өдгә цагин көвүнд амр биш.

Игорь Нарановин келсәр, тас шин керг болжана. Машиһар йовад тег хәләсн нег керг. Эврән темәһәр йовад, тееглә негдәд, цевр аһар кииләд, йоста чеежин сергмж авчна. Тер тет төрскнч ухан-серл орна.

Өдр болһн караван һучн-дөнч дуунад йовна. Шишлнг зогсалд амрад эдн хонна. Эн кемд эдн темәдән услад, эврән цогц-махмудан амраһад, цевр аһарт асхни хотан ууна. Хальмгин тег көк кевсәр бүркгәд, сәәхржәх цагт иим керг-үүлдвр өвәрц болж медгднә. Цаарандан зуульчнр олн дуунад йовх зөвтә. Нарта-делкән зуульч Федор Конюховин маршрутла эднә экспедициг дүнцүлж болшго. Тер бийнь ирчгдән туристнр у-өргн теегәр йовад, хальмг улсин кезәнк туужла болн сойлла өөрхн таньлдж болх. Экспедиц Приютненск районд бамб цецгүдин арлд күрх. Энд фестиваль секлһнә байрт эдн орлцх.

Ээнән Ольга, Хулхачин Николай