Алдр Диилврин байр күртл бумбс ясгдх
Хальмг танһчин аһуд төрскән харсгч дәәнлә залһлдата зун жирн мемориальн комплекс болн бумб бәәнә. Энүнд жил болһн ясврин көдлмш кех кергтә. Эндр танһчин толһачин медлд үүлджәх метәдтнрин хүүвин өргн сүүрт Алдр Диилврин далдгч жилин өөн күртл ямаран ясврин көдлмш кехин тускар күүндвр кегдв. Сүүрт Әрәсән правительствин медлд үүлджәх государственн туужин сойлын цутхлнгин директор, контр-адмирал Вячеслав Фетисов орлцв. Энүнә өмн гиич танһчин зәрм мемориальн комплекст одв. Элст балһснд Мөнк заль нертә мемориальн комплекст ясвр кехин төлә йирн сай арслнг кергтә. Ика Иванович Городовиковин бумбд шинрүлж яслһна көдлмш күцәхин төлә хөрн сай арслнг кергтә. Хулхт селәнә өөр бәәх мемориальн ик комплекст һучн тавн сай арслнг керглгджәнә. Өөрджәх байрт ик белдврин көдлмшт орлцхин зуран тускар Фетисов келж өгв.
