14 тойгта садын бичкдүд «Үр Сарин» байрин темдглв

Элст балһсна 14 тойгта бичкдүдин садын бичкдүд сурһмжлачнрла хамдан «Үр Сарин» байрин өдрмүдт нерәдж концерт давулв. Концертин йовудт бичкдүд дассн ду бииһән ирсн гиичнрт болн эк эцкнрт тусхав.

Ик кезәнәс нааран хальмг әмтн Үрс сарин байран темдглдг бәәсмн. Хавр чилхлә, зун цаг эклхлә нәр наадан эклдг билә.Дигтә эн сәәхн кемлә малын идг сән болна, шимтә ноһа идсн мал өснә. Кезәнәһә эн әрүн байрта өдрмүдт мана өвкнр теегт һарад һазр усан тәкж цеврләд, гелгдүд номан умшад, ээж ааавнр халун йөрәлән тәвәд, бичкдүд болхла ду бииһән үзүлдг бәәсмн.

«Жанһнрин ачнр» гидг багин бичкн көвүд күүкдин дуулсн дуд чикнә хужр ханһаж ирсн улсин седклин сергмж болснь лавта. Кен чигн күүнә жирһлд сурһмжлачин күргсн нилчнь ик. Күүг баһ-бичкнднь ухан-серлинь, билгинь илдкж, медрлин хаалһд орулдгнь сурһмжлач мөн. Инжин Любовь кезәнә шүүж авсн эрдмд дуран өгәд, седкл тусхаһад, дорас өсж йовх үйнрт хальмг кел дасхлһна халхар кесг жилмүдин эргцд көдлж йовна.

Үрс сарин байрин өдрмүдлә мана өвкнр Цаһан ааван күндлж ном ушдг бәәсмн. «Үрс»гисн үг марһан, бөк бәрлдән, дөрлдән гиж орчулгдна .Эн кемлә «эрин һурвн наадн» гидг марһа эклдг бәәсмн. Бикдүдин садын көвүд хальмг баатрмудыг дураһад дөрлдәһән үзүлв.

Мел иигәд сурһмжлач болһн, күн болһн буйнч седкл зүүж, дорас өсжәх баһчудт авьяс заншал дасхж, эврә тусан күргж йовхла, мана иргч — баһчуд эрүл-менд, эврә һазр-усндан төрскнч, танһчдан туста улс болж өсх гиж ицл төрнә.