Өнчн бичкдүдин төлә Элстд гер тосхгджана
Элст балһснд өнчн бичкдүдин болн эк-эцкин асрмж уга үлдсн көвүд-күүкдин төлә олн давхрта түрүн гер тосхгджана. Шин гериг эн жилин чилгч күртл бәрх саната. Тавн давхрта гериг Ипподромная уульнцд бәржәнә.
Ода тосхачнр олн давхрта герин ул тосхжана. Долан хонг болад шин герин негдгч давхр экләд бәрхмн. Тосхлтын көдлмш хойр девснгәр күцәгдх. Түрүләд жирн патьрта подьезд эн жилин чилгч күртл бәрх зура бәәнә. Энүнә хөөн танһчин шишлнг программар һурвн жилин эргцд хойр зун һучн өнчн бичкдүдин төлә долан минһн дөрвлжн метр әмтн бәәдг гермүд бәрх зура бәәнә.
Тосхлтын организацин директор Александр Бамбышевин келсәр, түрүн девснгд һурвн подьезд тосхгдх. Хойрдгч девснгд иргч жилин июль сард дәкәд хойр подьезд бәргдх, ут-тоодан тавн подьезд, подьезд болһн хөрн патьр, ут-турштан зун патьр эдлврт орх. Энд нурһлж нег хората патьрмуд һучн долан дөрвлжн метрта патьрмуд тосхгджана. Тосхачнр цуг көдлмш күцәх. Әмтн белн герт нүүж орх. Усна сурвлжн, газ болн канализац татгдв.
Сән бәәцин таалта патьрмуд шишлнг әмтн бәәдг гермүдин сангас бооцаһар тавн жилд нәәмәдлһнд өгхмн. Эн жилмүдт өнчн бичкдүд патьран хулдж чадшго болн сольж чадшго. Социальн халхар боомтг учрхла өнчн бичкдүд бооцаг дәкәд тавн жилдән батлж чадхмн. Иим зокал мек-тах кедг улсас саглулхин төлә батлж авгдсмн.
Танһчин һазрин болн зөөрин хәрлцәнә министр Николай Андреевин келсәр, өнчн көвүд — күүкд бичкдүдин гес һархла, мек-тах кедг улс эдниг мекләд, патьринь авчкна. Цааснд эдн патьрта болж бичгднә, зуг эдн бәәдг гер уга үлднә. Тегәд Әрәсән правительств өнчн бичкдүдт патьриг эзнә медлд өглго, тавн жилд нәәмәдлһн өгчәнә. Өнчн көвүд-күүкд энд бәәһәд, ижлдәд өсхлә, эзнә медлд авч чадх.
Ода социальн чинртә обьект федеральн мөнгәр тосхгджана. Болв октябрь сард танһчин бюджетас мөнгн кергтә болх. Тавн давхрта гер бәрхин төлә жирн сай арслнг олзгдх.
Николай Андреевин келсәр, иим гер бәрхин төлә федеральн бюджетас хөрн дөрвн дундур сай арслнг ирв, танһчин хазнас һучн тавн дундур сай арслнг ирх. Мана танһч мөнгнә ик зууһинь даажана. Юнгад гихлә, чеерүдт оллн күн зогсжана. Тегәд эдниг патьрмудар теткхин төлә иим шиидвр авгдв.
Шин гер тосхгджах кемд танһчин эрдм-сурһулин министерств шин бүүрт нүүж орх улсин то-диг батлж авчана. Ода чеерүдт иим нег минһн күн зогсжана.
Бичкдүдин гермүдин сурһмжлачнр льготн чеерүдт зогсжасн бийнь, закаһар өгх патьр авхд зөвәр жанһрта болв. Ода бичкддүин герәс һарсн хөөн, өнчн бичкдүд бәәдг герин тускар ухалшго. Эдн ода эврәннь гертә болх.
Ээнән Ольга, Хулхачин Николай
