Әәдрхнә зурачнр соньн һәәхүл авч ирв
Пальмовин нертә келн-улсин музейин дүрслгч искусствин сарул ик залд шин экспозиц белдгджәнә. Дүрслгч искусствд дурта хальмгин улсин төлә Астраханск областин зурачнр зургудын өвәрц һәәхүл белдв.
Альд чигн йовсн цагтан экләд көдлхдән белн сән кевәр зоргдсн карандаш авч йовна. Тегәд чигн олн һазрт зуульчлсн цагт кесг минһн зургуд, эскизмуд сул цагтан, хаалһд йовсн цагтан болн пленэрмудт зурна. Далн нас зүүв чигн Александр Шапошников ода күртл чанһ-чиирг, заглюн, дурта көдлмшән муурлго күцәнә, эргндк йиртмж медж авхин төлә зүткж соньмсна. Эн туст энүнд хамгин дурта акварель нөкд болна. Энүнә көдлмш, тер тоод Волга. Ветреный день нертә зург кесг жилдән күцәгднә. Эн зургиг һучн жил хооран Латвин орн-нутгт Куршск косад экләд зурсмн. Энүг зурач минь одахн эврә төрскн Ижл һолын көвәд төгсәж чадв.
Әрәсән ачта зурач Александр Шапошниковин келсәр, акварель хамгин дурта материал. Йир гиигн, жөөлн болн бүлән болж медгднә. Иим материалар зург зурхд тааста болна.
Зурачин тодлсар, кезә түрүн болж һартан карандан авсан медхш. Иим эрдмәр бичкн цагасн авн соньмсдг болв. Шулун-шудрмг көвүг эк-эцкнь тогтнулхин төлә зург зурх даалһвр өгдг бәәж. Тиигхлә көвүн тогтнад, кесгтән цаасн деер эврәннь уульнцан, гермүдән һол болн өөрхн улсиннь, нәәжнрин зург зурдг билә. Тегәд энүг изостудьт орулв, дарунь Крупскаян нертә искусствин Московск университетд сурад, түрүн профессиональн эрдм авсмн. Энүнә хөөн Александр Шапошников кесг жилдән Әрәсән худфондын астраханск художественн производвстенн мастеркойд көдлн бәәж, дурта эрдмән цаарандан делгрүлв. Зурачин үүдәврмүд нарта-делкән, цугәрәсән, танһчин болн зональн далн һәәхүлд тәвгдлә. Әрәсән ачта зурач Александр Шапошников эв харслһна Советск комитетин күндлһнә медаляр ачлгдв, Кустодиевин нертә мөрән лауреат. Өдгә цагт зурач ик оюни гүн ухан чинртә зургуд зурдг болв. Энүнә күүкн Наталья ямаран эрдм шүүж авхин тускар удан ухалсн уга.
Зурач Наталья Шапошникован келсәр, эрдм шүүж авх төр үүмүлсн уга. Гертнь оньдин шир билә. Гериннь өөр эцкин мастеркой бәәж. Тегәд эцкиннь хаалһ шүүж авв.
Зурач Наталья Шапошникова олн-зүсн жанрар көдлнә. Болв хамгин икәр йиртмж болн натюрморт зурхдан дурта. Репина нертә художествен академь төгсәв. Наталья эцкән дураһад аквареляр зургуд зурхдан дурлна. Индәс болн Израиляс авч энүнә зургудыг нүдән тәвлго хәләж болх. Энүнә үүдәврмүд сарул—серл, онц оюни чнртә болна. Специалистнрин темдглсәр, зурач нарна герлиг йир сәәнәр олзлна.
Һәәхүлин куратор Мария Дорджиеван келсәр, хойр зурачин үүдәврмүд йир соньн. Эцкиннь үүдәврмүд гүн ухан чинртә, күүкнәннь зургуд болхла ке-сәәхн өнгтә, күүкд улсин хәләц үзүлжәнә. Эдн хойр нег-негән немәд, аштнь өвәрц соньн һәәхүл бүрдәв.
Келхд, Александр Шапошников Элст балһснд хойрдгч һәәхүлян секжәнә. Түрүн болж йирн зурһадгч жилд акварелин зургуд авч ирж үзүлв. Эн саамд эврәннь күүктәһән Элст балһсна хәләһәчнрин төлә далн дөрвн көдлмш авч ирв.
Хавтхна Элла, Ирчин Алексей
