Һашута өөнин далн жил күцв
Далн жил хооран киитн декабрь сард хальмгудыг хол Сиврт күчәр нүүлһсмн, Танһчин зун минһн күн арвн һурвн жилдән төрскн һазрасн салад күзүцә золвн дааж һарв. Хальмгуд ик түрү-зүдү үзсн бийнь, өвкнриннь уул авьяс зангшал хадһлж чадв. Тер цагас кесг жил давсн бийнь, цаажла харһсн улсин зүркн ода күртл шарклна.
Хальмгин теегәс дөчн зурһан эшелонар киитн декабрин өдр зун хөрн минһн хальмгудыг Сиврт нүүлһсмн. Тер тоод арвн һурвн наста Эрднь Кензеев хол һазрт туугдв. Тер өдр көвүн интернатд бәәсн бәәж. Сурһуль сурх кергтә билә. Эк-эцкин гернь селәнәс хол бәәсмн. Тиигхд Эрднь тавдгч класст сурчасмн. Төрскн һазрасн хол киитн Сиврт бичкн көвүн талдан күүнә улсла хамдан нүүлһгдв. Эк-эцкләһән ик хөөннь харһв. Тиигхд шин һазрт өлсәд, даарад әрә гиж әмд үлдв.
Күч-көлснә ветеран Эрднь Кензеевин келсәр, һазр хаһлад, буудя тәрдг билә, шалһар өвс хадһх саамс учрв. Дөчн нәәмдгч жиләс авн мод белдж авлһна күнд көдлмшт йовдг болв.
Эрднь Кензеев насни туршт көдлдг билә. Күч-көлсч күүг түрүләд Омск областьд, хөөнь Ханты-Мансийск келн-улсин округд үнләд, кесг дәкж поселкин болн района хүүвин депутатд сунһж авла. Болв тууврт бәәсн күүнә ач-тусинь үнлдго бәәж. Тер бийнь Эрдни Ликшиковичиг депутад сунһж авч. Хамдан бәәсн олн келн-улс энүнд иткәд, дөн сурдг бәәж. Хоорндан ни-негн бәәж, хальмгудыг бәәрн улс һундадго билә. Эдн хальмгудт арһ-чидләрн нөкд болдг билә, бәәсәрн хувалцдг бәәж.
Сиврт көл деерән босад, өрк-бүлән тогтав, үрән өскв. Тәвн доладчг жилд гемәс болн күнд зовлнгас көлтә далн минһн хальмгуд хорв. Төрскн һазртан зуг далн минһн күн хәрж ирв. Эрдни Ликшикович өрк-бүлтәһән Яшкуль селәнд ирж буув.
Эрдни Кензеевин келсәр, тәвн доладгч жилд төрскн һазртан ирхлә, хоосн тег эжго һазр тоосн билә. Саман цокад гермүд тосхв. Совхозд гермүд бәрәд, дарунь бәәдл ясрв. Эндәс арвн дуунад бәәршлсн бәәж.
Эрдни Кензеев насни туршарт чидлән нөөлго көдлв. Ода найн һурвн наста, Тәвн жилдән малын ард көдлв. Зурһан үрнәс негнь Борис көвүһәрн бахмж кенә. Ода района зарһин ахлач болж көдлжәнә. Эрдни Кензеев арвн тавн ачнр-зеенртә, һурвн жич-зеенчртә. Хамгин бичкн жич Данзан көвүнд эврәннь ачлврин тускар келж өгнә. Тер бийнь Данзн дәкнәс ааваснь мөшкәд энүнә тускар сурна.
Эврәннь отхн жичдән адрута жирлһин хаалһар йовсн Эрдни Кензеевд келх үг дала. Улан Тугин күч-көлснә орденар, Күндлһнә темдгәр, медальмудар ачлгдв. Эннь Кензеевин өрк-бүлин болн яшкулихна йоста бахмж болжана. Хойр минһн нәәмдгч жилд күч-көлснә ветеран Эрднь Ликшикович Кензеевд Яшкуль селәнә күндтә гражданин гидг нер зүүлһв.
Хавтхна Элла, Котина Валерий
